”தீபாவளிப் பண்டிகையின் போது பட்டாசு வெடிப்பதால் ஏற்படும் ஒலி மாசு கட்டுப்பாடுகளைத் தளர்த்துவது குறித்து உடனடியாக பரிசீலிக்க வேண்டும்!” – மத்திய மாசுக் கட்டுப்பாட்டு வாரியத்திற்கு உச்சநீதிமன்றம் அதிரடியாக அறிவுறுத்தியுள்ளது. இந்தத் திடீர் உத்தரவு நாடு முழுவதும் உள்ள பட்டாசுப் பிரியர்கள் மற்றும் வியாபாரிகளிடையே மிகப்பெரிய எதிர்பார்ப்பையும் மகிழ்ச்சியையும் ஏற்படுத்தியுள்ளது.
பட்டாசு பயன்பாட்டிற்கு விதிக்கப்பட்ட பல்வேறு கடுமையான கட்டுப்பாடுகள் மற்றும் நேரக் கட்டுப்பாடுகள் தொடர்பான வழக்கு இன்று உச்சநீதிமன்றத்தில் விசாரணைக்கு வந்தது. அப்போது இந்த வழக்கை விசாரித்த உச்சநீதிமன்ற நீதிபதிகள் எம்.எம்.சுந்தரேஷ் மற்றும் பி.பி.வராலே ஆகியோர் அடங்கிய அமர்வு, தற்போதைய சூழலைக் கருத்தில் கொண்டு ஒலி மாசு விதிகளில் சில தளர்வுகளை வழங்குவது குறித்து பரிசீலிக்குமாறு அதிகாரிகளுக்கு அறிவுறுத்தியுள்ளது.
கடந்த சில ஆண்டுகளாகப் பண்டிகை காலங்களில் பட்டாசு வெடிப்பதற்கு பல்வேறு கட்டுப்பாடுகளும், குறிப்பிட்ட நேர வரம்புகளும் விதிக்கப்பட்டு வந்தன. இதனால் பொதுமக்கள் முழுமையாகப் பண்டிகையைக் கொண்டாட முடியாமலும், சிவகாசி உள்ளிட்ட பகுதிகளில் உள்ள பட்டாசு உற்பத்தித் தொழில் கடுமையாகப் பாதிக்கப்பட்டு வந்ததாகவும் குற்றச்சாட்டுகள் எழுந்தன. இந்நிலையில், உச்சநீதிமன்றத்தின் இந்த அறிவுறுத்தல் பட்டாசு உற்பத்தியாளர்களுக்கு ஒரு புதிய நம்பிக்கையைக் கொடுத்துள்ளது.
நீதிபதிகளின் இந்த அதிரடி உத்தரவைத் தொடர்ந்து, வரவிருக்கும் தீபாவளி பண்டிகையின் போது பட்டாசு ஒலி கட்டுப்பாடுகள் தளர்த்தப்பட்டு பொதுமக்கள் வழக்கம்போல பேரார்வத்துடனும் உற்சாகமாகவும் கொண்டாட வழிவகை செய்யப்படுமா என்ற கேள்வி எழுந்துள்ளது. மத்திய மாசுக் கட்டுப்பாட்டு வாரியம் இதுகுறித்து விரைவாக முடிவெடுத்து புதிய வழிகாட்டுதல்களை வெளியிடும் என எதிர்பார்க்கப்படுகிறது.
