தமிழ்நாடு சட்டப்பேரவைக் கூட்டத்தொடர் மிகவும் விறுவிறுப்பாகவும் சுவாரசியமாகவும் நடைபெற்று வருகிறது. இந்த கூட்டத்தொடரில் தமிழக முதல்வர் விஜய் பல்வேறு அதிரடி அறிவிப்புகளை வெளியிட்டுள்ளார். குறிப்பாக ஆவின் பால் கொள்முதல் விலை உயர்வு மற்றும் மருத்துவ காப்பீட்டுத் தொகையை 5 லட்ச ரூபாயிலிருந்து 25 லட்ச ரூபாயாக உயர்த்தியது போன்ற அறிவிப்புகள் மக்களிடையே பெரும் வரவேற்பைப் பெற்றுள்ளன.

கடந்த சில நாட்களுக்கு முன்பு நடைபெற்ற விவாதத்தின் போது, விடுதலை சிறுத்தைகள் கட்சி எம்எல்ஏ ஜோதிமணி, தன்னிடம் கார் வசதி இல்லாததால் தொகுதிப் பணிகளை மேற்கொள்வதில் சிரமம் இருப்பதாகவும், அரசு சார்பில் எம்எல்ஏக்களுக்கு வாகனம் மற்றும் உதவியாளர் வழங்க வேண்டும் என்றும் கோரிக்கை விடுத்திருந்தார்.

இதனை ஏற்றுக்கொண்ட முதல்வர் விஜய், சட்டப்பேரவையில் 110 விதியின் கீழ் அதிரடி அறிவிப்பு ஒன்றை வெளியிட்டார். அதன்படி, அனைத்து சட்டமன்ற உறுப்பினர்களுக்கும் தொகுதிப் பணிகளைத் தடையின்றி மேற்கொள்ள அரசு சார்பில் வாகனம் வழங்கப்படும் என்றும், ஓட்டுநர் மற்றும் எரிபொருள் செலவிற்காக மாதந்தோறும் 75 ஆயிரம் ரூபாய் பராமரிப்புத் தொகையும், உதவியாளர் ஊதியத்திற்காக 25 ஆயிரம் ரூபாயும் வழங்கப்படும் என்று அறிவித்தார். முதல்வரின் இந்த அதிரடியான அறிவிப்பைக் கேட்டவுடன் சட்டமன்ற உறுப்பினர்கள் அனைவரும் மேசையைத் தட்டிங்களமாகத் தங்களது மகிழ்ச்சியை வெளிப்படுத்தினர்.

 

அனைத்து எம்எல்ஏக்களுக்கும் கார் வழங்கப்படும் என்ற அறிவிப்பு வெளியானதும், தமிழக வெற்றிக் கழகத்தின் (தவெக) எம்எல்ஏவான சண்முகம் உடனடியாக எழுந்து ஒரு சுவாரசியமான கோரிக்கையை முன்வைத்தார். “கார் கொடுக்கிறதுதான் கொடுக்கிறீங்க… இனோவா காரா கொடுத்தா இன்னும் கொஞ்சம் நன்றாக இருக்குமே சார்” என்று முதல்வர் விஜய்யை பார்த்து அவர் நமுட்டுச் சிரிப்புடன் கேட்க, அதைக் கேட்ட உடனே அவையில் இருந்த அமைச்சர்கள், சகாக்களான எம்எல்ஏக்கள் மற்றும் பேரவைத் தலைவர் என அனைவரும் சத்தமாகச் சிரிக்கத் தொடங்கினர். இந்த கலகலப்பான தருணம் மற்றும் அதனுடன் தொடர்புடைய காட்சிகள் தற்போது சமூக வலைதளங்களில் பெரும் வைரலாக பரவி வருகிறது