விமானப் பயணம் முடிந்து பயணிகள் வெளியேறியபோது, விமானப் பணிப்பெண்ணுக்கு சில வயதான பெண்கள் அன்புடன் வாழ்த்தும் காட்சிகள் இணையத்தில் கவனம் பெற்றுள்ளன. மடிஹா ராஜ்புத் என்பவர் பகிர்ந்த வீடியோவில், விமானத்தில் இருந்து இறங்கும் பெண்கள் ஒவ்வொருவரும் விமானப் பணிப்பெண்ணிடம் அன்பாக நடந்து கொள்கின்றனர். சிலர் அவரது தலையில் கை வைத்து ஆசீர்வாதம் வழங்குகின்றனர். மற்றொரு பெண் அவரிடம் நன்றி தெரிவித்து அன்பை வெளிப்படுத்துகிறார். பயணத்தின்போது பணிப்பெண் காட்டிய அக்கறைக்கு பதிலாக இந்த அன்பு கிடைத்ததாக விடியோவில் குறிப்பிடப்பட்டுள்ளது.
விமானத்தில் முதல் முறையாக பயணம் செய்பவர்கள் முதல் வயதானவர்கள் மற்றும் குழந்தைகள் வரை பல்வேறு பயணிகளின் தேவைகளை விமானப் பணிப்பெண்கள் கவனித்து வருகின்றனர். பயணிகளுக்கு தேவையான உதவிகளை செய்வதுடன், விமானப் பயணம் சுமுகமாக நடைபெறுவதிலும் அவர்கள் முக்கிய பங்கு வகிக்கின்றனர். இதனால் சில நேரங்களில் பணிக்கும் அப்பாற்பட்ட மனிதநேய உறவும் பயணிகளுடன் ஏற்படுகிறது. அந்த வகையில், விமானத்தில் இருந்து இறங்கிய சில பெண்கள் பணிப்பெண்ணுக்கு அன்பையும் ஆசீர்வாதத்தையும் வழங்கியுள்ளனர். இந்த காட்சிகள் தற்போது சமூக வலைதளங்களில் பலரது கவனத்தை ஈர்த்துள்ளன.
View this post on Instagram
வீடியோவில் சில வயதான பெண்கள் விமானப் பணிப்பெண்ணின் தலையில் கை வைத்து ஆசீர்வதிப்பதைக் காண முடிகிறது. மற்றொரு பெண் தனது வழக்கமான முறையில் அவருக்கு நன்றி தெரிவித்ததாக கூறப்படுகிறது. இந்த அன்பான தருணம் குறித்து மடிஹா ராஜ்புத் தனது சமூக வலைதளப் பதிவில், பயணத்தின் முடிவில் கிடைத்த சிறப்பான பிரியாவிடை என குறிப்பிட்டுள்ளார். மேலும், மனிதர்களிடம் காட்டப்படும் கருணை எப்போதும் உயர்ந்தது என்பதை இதுபோன்ற தருணங்கள் நினைவூட்டுவதாகவும் அவர் தெரிவித்துள்ளார். பணிக்காக கிடைக்கும் ஊதியத்தைத் தாண்டி கிடைக்கும் இதுபோன்ற அன்பும் மரியாதையும் மனதை நெகிழச் செய்வதாக கூறப்பட்டுள்ளது.
இந்த வீடியோ இணையத்தில் வேகமாக பரவி வருகிறது. சுமார் இரண்டரை கோடி பேர் இதனை பார்த்துள்ளதாகவும், 19 லட்சத்துக்கும் அதிகமானோர் விருப்பம் தெரிவித்துள்ளதாகவும் செய்தியில் குறிப்பிடப்பட்டுள்ளது. மேலும், 7 ஆயிரத்துக்கும் அதிகமான கருத்துகளும் பதிவாகியுள்ளன. பலரும் வயதான ஒருவர் தலையில் கை வைத்து ஆசீர்வதிப்பது மிகவும் நெகிழ்ச்சியான தருணம் என்று கருத்து தெரிவித்துள்ளனர். மதம், மொழி, பின்னணி ஆகியவற்றைக் கடந்து மனிதநேயம் அனைவரையும் இணைக்கும் என்பதை இந்த காட்சி உணர்த்துவதாகவும் பலர் குறிப்பிட்டுள்ளனர்.
