கிரிக்கெட் மைதானத்தில் எத்தனையோ சிக்சர்களும் பவுண்டரிகளும் ரசிக்கப்பட்டிருக்கும்; ஆனால், யாரும் கற்பனையே செய்திராத ஒரு விபத்து, ஒரு வீரரின் விக்கெட்டைப் பறித்து கிரிக்கெட் உலகையே திரும்பிப் பார்க்க வைக்கும் என்றால் நம்ப முடிகிறதா? அப்படிப்பட்ட ஒரு சம்பவம் தற்போது காலே மைதானத்தில் நடந்துள்ளது.

அதாவது இந்தியா – இலங்கை அணிகளுக்கு இடையேயான வரலாற்றுச் சிறப்புமிக்க டெஸ்ட் போட்டி காலே மைதானத்தில் நடைபெற்று வருகிறது. இது இந்திய அணியின் 600-வது டெஸ்ட் போட்டியாகும். இதில் டாஸ் வென்ற இந்திய அணி முதலில் பேட்டிங்கைத் தேர்ந்தெடுத்தது. தொடக்க ஆட்டக்காரர்களான கே.எல். ராகுலும், இளம் வீரர் யஷஸ்வி ஜெய்ஸ்வாலும் களமிறங்கி சிறப்பான தொடக்கத்தை வழங்கினர்.

 

குறிப்பாக, யஷஸ்வி ஜெய்ஸ்வால் வழக்கம் போல அதிரடி ஆட்டத்தை வெளிப்படுத்தி பவுண்டரிகளாக விளாசிக் கொண்டிருந்தார். அவர் ஆடிய விதத்தைப் பார்த்தால், இலங்கைக்கு எதிராக தனது முதல் டெஸ்ட் அரைசதத்தை அவர் எட்டிவிடுவார் என்றே அனைவரும் எதிர்பார்த்தனர். ஸ்கோர் பலகையில் 47 ரன்கள் ஏறியிருந்த போது, இந்தியாவின் 11-வது ஓவர் வீசப்பட்டது.

அப்போது கே.எல். ராகுல் அடித்த பந்தை பந்துவீச்சாளர் தடுத்து நிறுத்த முயன்றார். எதிர்பாராதவிதமாக, நான்-ஸ்ட்ரைக்கர் முனையில் நின்றுகொண்டிருந்த யஷஸ்வி ஜெய்ஸ்வால் மீது அந்தப் பந்துவீச்சாளர் மோத, நிலைதடுமாறி கீழே விழுந்தார் ஜெய்ஸ்வால். உடனடியாக சுதாரித்து எழுந்த அவர், ஓட முயன்ற திசையில் ஏற்பட்ட குழப்பத்தால் மீண்டும் அதே முனையை நோக்கி ஓடினார். மறுபுறம் ராகுலும் அதே முனையை நோக்கி ஓடிவர, இலங்கை வீரர்கள் சற்றும் தாமதிக்காமல் ரன் அவுட் வாய்ப்பைப் பயன்படுத்திக் கொண்டனர்.

பேட்டிங்கில் எந்தக் தவறும் செய்யாமல், களத்தில் அருமையாகப் பந்துகளை எதிர்கொண்டு வந்த ஜெய்ஸ்வால், 37 பந்துகளில் 32 ரன்கள் எடுத்த நிலையில் இப்படி ஒரு எதிர்பாராத விபத்தால் ரன் அவுட்டாகி வெளியேறியது மைதானத்தில் இருந்த அனைவரையும் சோகத்தில் ஆழ்த்தியது.