கேரளா என்றாலே மூணாறு, வாகமன் போன்ற பிரபலமான சுற்றுலா தலங்கள்தான் முதலில் நினைவுக்கு வரும். ஆனால், கூட்ட நெரிசலிலிருந்து விலகி இயற்கையின் அமைதியை ரசிக்க விரும்புபவர்களுக்கு பத்தனம்திட்டா மாவட்டத்தில் இருக்கும் கவி முற்றிலும் வித்தியாசமான அனுபவத்தைத் தருகிறது. மலைகள், பள்ளத்தாக்குகள், அடர்ந்த காடுகள், நீரோடைகள் என சுற்றிலும் பசுமை நிறைந்திருக்கும் இந்த பகுதி பெரியார் புலிகள் காப்பகத்துடன் தொடர்புடைய வனப்பகுதியாகும்.
கவிக்குச் செல்லும் பயணமே ஒரு தனி அனுபவமாக இருக்கும். வழியில் அடர்ந்த காடுகள், மலைப்பாதைகள், நீர்நிலைகள், நீர்வீழ்ச்சிகள் மற்றும் ஏலக்காய் தோட்டங்களை கடந்து செல்லலாம். இயற்கையை நெருக்கமாக ரசிக்க விரும்புபவர்களுக்கு படகு சவாரி, மலையேற்றம், காட்டுப் பயணம் மற்றும் முகாமிடுதல் போன்ற அனுபவங்களும் கிடைக்கின்றன.
கவி பகுதி இயற்கை வளத்துக்கு மட்டுமல்ல, வனவிலங்குகளுக்கும் பெயர் பெற்றது. யானைகள், இந்திய கவுர், மான்கள், நீலகிரி லாங்கூர் உள்ளிட்ட பல்வேறு விலங்குகளுடன் ஏராளமான பறவை இனங்களையும் இப்பகுதியில் காண முடியும். பறவைகளை ரசிப்பவர்களுக்கு கவி சிறப்பான இடமாக இருப்பதாக கேரள சுற்றுலாத்துறை குறிப்பிடுகிறது. மரக்குடில்கள் மற்றும் கூடாரங்களில் தங்கும் வசதிகளும் இருப்பதால், நகர வாழ்க்கையிலிருந்து விலகி காட்டின் சூழலை அனுபவிக்க முடியும்.
அதேநேரத்தில், இது பாதுகாக்கப்பட்ட வனப்பகுதியுடன் தொடர்புடைய சுற்றுலாத் தலம் என்பதால் பயணிகளுக்கும் சில கட்டுப்பாடுகள் உள்ளன. குறிப்பிட்ட பகுதிகளில் மட்டுமே வாகனங்களை நிறுத்த வேண்டும்; வனப்பகுதியில் குப்பைகளை வீசுவது போன்ற செயல்களைத் தவிர்க்க வேண்டும். இயற்கையையும் வனவிலங்குகளையும் பாதிக்காமல் பயணம் செய்வதே கவியின் அழகை நீண்ட காலத்துக்கு பாதுகாக்க உதவும்.
