தமிழக சட்டப்பேரவையில் பட்ஜெட் மற்றும் வேளாண் பட்ஜெட் மீதான விவாதம் இன்றும் தீவிரமாகத் தொடர்ந்தது. அவையின் மாண்பைக் காக்கும் விவாதங்களுக்கு இடையே, தொகுதிப் பிரச்சினைகள் தொடர்பான நேரடிப் புகார்களும் அமைச்சர்களின் எதிர்வினைகளும் அரங்கைச் சூடேற்றின.

இன்றைய அமர்வின் போது பேசிய TVK MLA நவல்பட்டு விஜி, திருவெறும்பூர் தொகுதியில் பட்டா வழங்கப்பட்ட இடத்தையே காணவில்லை என்றும், அப்படி வழங்கப்பட்டவை அனைத்தும் போலி பட்டாக்கள் என்றும் பகிரங்கக் குற்றச்சாட்டை முன்வைத்தார். மேலும், “இந்த விவகாரம் மாவட்ட கலெக்டருக்கும் நன்றாகத் தெரியும். வரவிருக்கும் தேர்தலை மனதில் வைத்து ஓட்டுகளைக் குறிவைத்து மட்டுமே இந்த போலி பட்டாக்கள் வழங்கப்பட்டுள்ளன. எனவே, இது குறித்து உயர்மட்ட ஆய்வு நடத்தப்பட வேண்டும்” என்று வலியுறுத்தினார்.

இதற்கு உடனடியாகப் பதிலடி கொடுத்துப் பேசிய திமுக முன்னாள் அமைச்சர் கே.கே.எஸ்.எஸ்.ஆர். ராமச்சந்திரன், இந்த விவகாரத்தில் அரசின் நிலைப்பாட்டை விளக்கிப் பேசினார். “கடந்த திமுக ஆட்சிக் காலத்தில் மட்டும் இதுவரை இல்லாத சாதனையாக 73 லட்சம் பேருக்கு முறையான பட்டா வழங்கப்பட்டுள்ளது. தமிழ்நாட்டு வரலாற்றிலேயே இதுவே மிக அதிக எண்ணிக்கையாகும். முழுக்க முழுக்கத் தகுதியான நிலங்களுக்கு மட்டுமே இந்த பட்டாக்கள் வழங்கப்பட்டுள்ளன” என்று திட்டவட்டமாகத் தெரிவித்தார்.

இந்த விவாதம் மேலும் பரபரப்பான கட்டத்தை எட்டியபோது, கால்நடைத்துறை அமைச்சர் கமலி குறிக்கிட்டுப் பேசினார். அப்போது அவர், “இது போன்ற முறைகேடு புகார்கள் என்னிடமும் வந்துள்ளன. பொதுமக்கள் நேரடியாக என்னிடம் அளித்துள்ள புகார் மனுக்களை நான் நிச்சயம் இந்த அவையில் உரிய முறையில் சமர்ப்பிப்பேன்” என்று தெரிவித்தார்.