தனக்கு ஏற்பட்ட உடல்நலக் குறைவுக்குச் சிகிச்சை பெற்று குணமடையலாம் என்ற நம்பிக்கையோடு அரசு மருத்துவமனைக்கு வரும் ஏழை எளிய மக்களுக்கு, அந்த மருத்துவமனை கட்டிடமே எமனாக மாறும் கொடூரம் ராஜஸ்தான் மாநிலத்தில் அரங்கேறியுள்ளது. ராஜஸ்தான் மாநிலத்தின் சூரு மாவட்டத்தில் உள்ள அரசு மருத்துவமனைக்கு, பெண் நோயாளி ஒருவர் தனது நோய்க்கான மருத்துவச் சிகிச்சையைப் பெறுவதற்காக வழக்கம்போல் வந்துள்ளார்.

மருத்துவமனையின் நோயாளிகள் காத்திருக்கும் பகுதியில் அமர்ந்து, மருத்துவர் வந்து தன்னைப் பரிசோதிப்பார் என்று அவர் ஆவலோடு காத்திருந்த தருணத்தில்தான், யாருமே எதிர்பாராத அந்தப் பேராபத்து மேலிருந்து வந்து இறங்கியுள்ளது. மருத்துவர் வந்து அவரைச் சோதித்துச் சிகிச்சையளிப்பதற்கு முன்பாகவே, கட்டடத்தின் பழமையான கூரையின் ஒரு பகுதி திடீரெனப் பலத்த சத்தத்துடன் இடிந்து அந்தப் பெண்ணின் மீது நேராக விழுந்தது.

கூரையின் சிமெண்ட் காரைகளும் இடிபாடுகளும் தலையிலும் உடலிலும் விழுந்ததில், அந்தப் பெண் நிலைகுலைந்து போய் ரத்த வெள்ளத்தில் சரிந்தார். இந்த எதிர்பாராத விபத்தைக் கண்டு அங்கே காத்திருந்த சக நோயாளிகளும் உறவினர்களும் அலறி அடித்துக் கொண்டு நாலாபுறமும் ஓடியதால், மருத்துவமனை வளாகமே சில நிமிடங்கள் பெரும் பதற்றத்திலும் கூச்சல் குழப்பத்திலும் மூழ்கியது.

சிகிச்சை பெற்று உயிரைக் காப்பாற்றிக் கொள்ள ஓடிவரும் அரசு மருத்துவமனைகளின் பராமரிப்பு எந்த அளவுக்கு அலட்சியமாக இருக்கிறது என்பதற்கு இந்தச் சம்பவமே சாட்சியாக அமைந்துள்ளது. கட்டடங்களின் பலத்தை அவ்வப்போது ஆய்வு செய்யாமலும், சீரமைக்காமலும் விட்ட அதிகாரிகளின் மெத்தனப் போக்கே இந்த விபரீதத்திற்குக் காரணம் எனப் பொதுமக்கள் கடும் கொந்தளிப்புடன் குற்றம் சாட்டுகின்றனர்.

இந்நிலையில் உயிருக்குப் பாதுகாப்பு இல்லாத சூழலில் அரசு மருத்துவமனைகள் இயங்குவது குறித்துப் பலரும் கேள்வி எழுப்பி வரும் நிலையில், காயமடைந்த பெண்ணிற்குத் தீவிர சிகிச்சை அளிக்கப்பட்டு வருகிறது.

“>