கர்ப்ப காலத்தில் பெண்கள் தங்களது உடல்நலனில் அதிக கவனம் செலுத்துவது வழக்கம். அந்த வகையில், “கர்ப்ப காலத்தில் தினமும் நடைபயிற்சி  செய்யலாமா? அப்படிச் செய்வது பாதுகாப்பானது தானா?” என்ற கேள்வி பெரும்பாலான கர்ப்பிணிப் பெண்களின் மனதில் எழுவது இயல்பு தான். ஆனால், முறையான நடைபயிற்சி கர்ப்பிணிகளின் உடலுக்கும் மனதுக்கும் மிகவும் பாதுகாப்பானது மற்றும் நன்மை பயக்கக்கூடியது என மருத்துவர்கள் பரிந்துரைக்கின்றனர்.

கர்ப்ப காலத்தில் மிதமான நடைபயிற்சி மேற்கொள்வது உடலின் இரத்த ஓட்டத்தைச் சீராக்கப் பெரிதும் உதவுகிறது. இது கர்ப்ப காலத்தில் ஏற்படும் தேவையற்ற உடல் எடைக் அதிகரிப்பைக் கட்டுப்படுத்துவதோடு, இரத்த சர்க்கரை அளவை  சீராக வைத்திருக்கவும் துணையாக நிற்கிறது. மேலும், தினமும் நடைபயிற்சி செய்வதன் மூலம் உடலின் தசைநார்கள் நெகிழ்வுத்தன்மை பெற்று வலுவடைகின்றன.

முக்கியமாக, பிரசவ நேரத்தை எதிர்கொள்வதற்கு நடைபயிற்சி சிறந்த ஆயத்தமாக அமைகிறது. இடுப்புப் பகுதி தசைகளை வலுவாக்கி, பிரசவ வலியைத் தாங்கும் திறனை உடலுக்கு வழங்குவதுடன் சுகப்பிரசவம்  ஆவதற்கான வாய்ப்புகளையும் இது கணிசமாக அதிகரிக்கிறது. அதுமட்டுமின்றி, கர்ப்ப காலத்தில் பலரையும் வாட்டி வதைக்கும் மலச்சிக்கல் மற்றும் கை, கால் வீக்கம் போன்ற பிரச்சினைகளுக்கும் நடைபயிற்சி நல்ல நிவாரணம் தருகிறது.

அதேபோல், கர்ப்ப காலத்தில் ஏற்படும் ஹார்மோன் மாற்றங்களால் உண்டாகும் மன அழுத்தம், பதற்றம் மற்றும் தூக்கமின்மை போன்ற பிரச்சினைகளைத் தவிர்க்க தினசரி நடைபயிற்சி பெரிதும் உதவுகிறது. நடைபயிற்சியின் போது சுரக்கும் நல்ல ஹார்மோன்கள் மனதை அமைதியாகவும் புத்துணர்ச்சியுடனும் வைத்திருக்கச் செய்யும். எனவே, மருத்துவரின் ஆலோசனையைப் பெற்று, தினமும் சிறிது நேரம் நடைபயிற்சி மேற்கொள்வது தாய்க்கும் சேய்க்கும் பூரண ஆரோக்கியத்தைத் தரும்!