ஐபிஎல் தொடரில் மும்பை இந்தியன்ஸ் அணியின் கேப்டன் ஹர்திக் பாண்டியா, அடுத்த சீசனுக்கு முன்பாக வேறு அணிக்கு மாறப்போவதாகப் பரவலாகப் பேசப்பட்டு வந்தது. கடந்த மூன்று ஆண்டுகளாக ஹர்திக் தலைமையிலான மும்பை அணியின் செயல்பாடு திருப்திகரமாக இல்லாததே இதற்குக் காரணமாகக் கூறப்படுகிறது.

அவர் சென்னை சூப்பர் கிங்ஸ்  அணிக்கு மாற வாய்ப்புள்ளதாக வதந்திகள் பரவிய நிலையில், இதற்கு சிஎஸ்கே அணியின் தலைமை நிர்வாக அதிகாரி காசி விஸ்வநாதன் முற்றுப்புள்ளி வைத்துள்ளார். இது குறித்து அவர் கூறுகையில், “இதுவரை நாங்கள் எந்த முடிவும் எடுக்கவில்லை, இத்தகைய பேச்சுக்களில் எந்த உண்மையும் இல்லை. தற்போதைய தொடர்கள் முடிந்த பிறகுதான் வீரர்கள் பரிமாற்றம் குறித்து ஆலோசிப்போம்” என்று தெளிவாகக் குறிப்பிட்டுள்ளார்.

மும்பை இந்தியன்ஸ் தரப்பிலும் இத்தகைய வீரர் பரிமாற்றங்கள் குறித்து இதுவரை எந்தப் பேச்சுவார்த்தையும் நடைபெறவில்லை என்று தெரிவிக்கப்பட்டுள்ளது. ஹர்திக் பாண்டியா 2015 முதல் ஐபிஎல் தொடரில் விளையாடி வருகிறார். குஜராத் டைட்டன்ஸ் அணியின் கேப்டனாக முதல் சீசனிலேயே கோப்பையை வென்று கொடுத்த அவர், 2024-இல் மும்பை அணிக்குத் திரும்பினார்.

இருப்பினும், கடந்த மூன்று சீசன்களில் மும்பை அணியின் மோசமான ஆட்டத்தால் ஹர்திக் விமர்சனங்களுக்கு உள்ளாகியுள்ளார். பெங்களூரு மற்றும் ஹைதராபாத் தவிர மற்ற அனைத்து அணிகளும் அவரைத் தங்கள் அணிக்கு எடுக்க ஆர்வம் காட்டுவதாகச் செய்திகள் வெளியானாலும், தற்போது வரை எந்த அணியும் அதிகாரப்பூர்வமாக முன்வரவில்லை என்பது குறிப்பிடத்தக்கது.