இலங்கை சுற்றுப்பயணம் மேற்கொள்ளவுள்ள இந்திய அண்டர்-19 (19 வயதுக்குட்பட்டோர்) கிரிக்கெட் அணியை பிசிசிஐ (BCCI) இன்று அதிகாரப்பூர்வமாக அறிவித்துள்ளது. மூன்று ஒருநாள் போட்டிகள் மற்றும் இரண்டு பலநாட்கள் (Multi-day) கொண்ட போட்டிகளில் விளையாடுவதற்காக இந்த இளம் இந்திய அணி அறிவிக்கப்பட்டுள்ளது. வரும் ஜூலை 4-ஆம் தேதி தொடங்கும் இந்த இலங்கை தொடருக்கான இந்திய அணியின் கேப்டனாக யஷ்வர்தன் சிங் சவுகான் நியமிக்கப்பட்டுள்ளார். இவர் ஒருநாள் மற்றும் பலநாட்கள் போட்டிகள் என இரண்டுக்குமே தலைமை தாங்குவார்.

இரண்டு தொடர்களுக்குமான துணை கேப்டனாக லக்ஷ்யா ராய்சந்தானி செயல்படுவார். இந்த அணியில் முன்னாள் இந்திய ஜாம்பவான் ராகுல் டிராவிட்டின் மகன் அன்வய் டிராவிட் விக்கெட் கீப்பராக தேர்வு செய்யப்பட்டுள்ளது ஒட்டுமொத்த கிரிக்கெட் உலகிலும் பெரும் கவனத்தைப் பெற்றுள்ளது. எனினும், அன்வய் டிராவிட் ஒருநாள் போட்டித் தொடருக்கு மட்டுமே தேர்வு செய்யப்பட்டுள்ளார், பலநாட்கள் போட்டித் தொடரில் மானவ் கிருஷ்ணா மற்றும் ஆர்யன் சந்தேஷ் சக்பால் ஆகியோர் விக்கெட் கீப்பர்களாக செயல்படவுள்ளனர்.

இந்த இலங்கை சுற்றுப்பயணம் ஒருநாள் போட்டித் தொடருடன் தொடங்குகிறது. முதலாவது ஒருநாள் போட்டி ஜூலை 4-ஆம் தேதியும், இரண்டாவது போட்டி ஜூலை 6-ஆம் தேதியும், மூன்றாவது மற்றும் இறுதி ஒருநாள் போட்டி ஜூலை 9-ஆம் தேதியும் நடைபெறவுள்ளன. இந்த மூன்று ஒருநாள் போட்டிகளும் ஹம்பாந்தோட்டை மைதானத்திலேயே நடத்தப்படவுள்ளது குறிப்பிடத்தக்கது.

இதனைத் தொடர்ந்து, முதலாவது பலநாட்கள் கொண்ட போட்டி ஜூலை 13 முதல் 16 வரை காலி (Galle) மைதானத்திலும், இரண்டாவது பலநாட்கள் கொண்ட போட்டி ஜூலை 20 முதல் 23 வரை கொழும்பிலும் நடைபெறவுள்ளன. ரோஹித் அனில் யாதவ், இஷான் சூட் உள்ளிட்ட பல இளம் திறமைகளுக்கு இந்த அணியில் வாய்ப்பளிக்கப்பட்டுள்ளது. எதிர்கால இந்திய சீனியர் அணியை உருவாக்கும் நோக்கில் இந்த இளம் வீரர்களின் செயல்பாடு மிக உன்னிப்பாகக் கவனிக்கப்படும் என்பதால் இத்தொடர் பெரும் எதிர்பார்ப்பை ஏற்படுத்தியுள்ளது.