அமெரிக்காவில் முறையான ஆவணங்களின்றி சட்டவிரோதமாகத் தங்கி, வணிகரீதியான கனரக லாரிகளை ஓட்டி வந்த இந்தியர்கள் 30 பேர் உட்பட மொத்தம் 52 பேரை அந்நாட்டு எல்லைப் பாதுகாப்புப் படையினர் அதிரடியாகக் கைது செய்துள்ளனர். அமெரிக்கக் குடியரசுத் தலைவர் டொனால்ட் டிரம்ப் நிர்வாகத்தின் கீழ், தகுதியற்ற வெளிநாட்டு ஓட்டுநர்களுக்கு வணிகரீதியான உரிமங்கள் வழங்குவதைத் தடுக்கும் உத்தரவு அமலில் உள்ள நிலையில், இந்த அதிரடி நடவடிக்கை மேற்கொள்ளப்பட்டுள்ளது. கைதானவர்களில் பெரும்பாலானோரிடம் ஜோ பைடன் நிர்வாகத்தின் போது வழங்கப்பட்ட வேலைவாய்ப்பு அனுமதி ஆவணங்கள் இருந்தபோதிலும், அவற்றின் காலக்கெடு தற்போது முடிவடைந்துவிட்டதாக அதிகாரிகள் தெரிவித்துள்ளனர்.

அமெரிக்கச் சுங்கம் மற்றும் எல்லைப் பாதுகாப்புப் பிரிவு வெளியிட்டுள்ள அறிக்கையின்படி, கடந்த மே 11 முதல் 15-ஆம் தேதி வரை அரிசோனாவின் யுமா பகுதியில் “ஆபரேஷன் செக்மேட்”  என்ற பெயரில் கூட்டாட்சி முகவர்களால் இந்தத் தீவிரப் பாதுகாப்பு வேட்டை நடத்தப்பட்டது. கைதான ஓட்டுநர்களிடம் கலிபோர்னியா, நியூயார்க், வாஷிங்டன் மற்றும் வர்ஜீனியா போன்ற பல்வேறு மாகாணங்களின் வணிகரீதியான ஓட்டுநர் உரிமங்கள்  இருந்துள்ளன. அதே சமயம், சில ஓட்டுநர்களிடம் எந்தவித உரிமமும் இல்லை என்பதும் விசாரணையில் அம்பலமாகியுள்ளது. கைதான அனைவரும் விரைவில் அமெரிக்காவை விட்டு வெளியேற்றப்பட்டு  இந்தியாவிற்குத் திருப்பி அனுப்பப்படவுள்ளனர்.

இச்சம்பவம் குறித்து யுமா பகுதி எல்லைப் பாதுகாப்புப் படையின் தற்காலிகத் தலைவர் டஸ்டின் காடில் கூறுகையில், “பொதுமக்களின் பாதுகாப்பிற்கு அச்சுறுத்தலாக விளங்கும் மற்றும் ஆபத்தான சாலை விபத்துகளுக்குக் காரணமான சட்டவிரோத ஓட்டுநர்களிடமிருந்து நமது சாலைகளையும் சமூகத்தையும் பாதுகாப்பதே ‘ஆபரேஷன் செக்மேட்’ திட்டத்தின் முக்கிய நோக்கமாகும்” என்று தெரிவித்துள்ளார்.