இந்தியாவின் வான்வெளிப் பாதுகாப்பை மேலும் பலப்படுத்தும் நோக்கில், ரஷ்யாவிடமிருந்து அதிநவீன எஸ்-400 (S-400) ரக நீண்டதூர வான் பாதுகாப்பு ஏவுகணை அமைப்புகளின் கூடுதல் தொகுப்பினை வாங்குவது குறித்து இரு நாடுகளுக்கும் இடையே தீவிர பேச்சுவார்த்தை நடைபெற்று வருகிறது. ரஷ்யாவின் ராணுவ-தொழில்நுட்ப ஒத்துழைப்புக்கான கூட்டாட்சி நிறுவனம் (FSVTS) இத்தகவலை அதிகாரப்பூர்வமாக உறுதிப்படுத்தியுள்ளது.

முன்னதாக, கடந்த 2018-ஆம் ஆண்டில் 5.4 பில்லியன் டாலர் (சுமார் ரூ.45,000 கோடி) மதிப்பில் ஐந்து எஸ்-400 ஏவுகணை அமைப்புகளை வாங்குவதற்கு இந்தியா வரலாற்றுச் சிறப்புமிக்க ஒப்பந்தம் செய்திருந்தது. இதில் 3 அமைப்புகள் ஏற்கனவே இந்தியாவிடம் ஒப்படைக்கப்பட்டுவிட்ட நிலையில், உக்ரைன் போரினால் ஏற்பட்ட விநியோகத் தாமதங்கள் சரிசெய்யப்பட்டு, எஞ்சிய இரண்டு அமைப்புகளும் இந்த ஆண்டு நவம்பர் மாதத்திற்குள் இந்தியாவிற்கு முழுமையாக வழங்கப்படவுள்ளன.

இந்திய விமானப் படையால் ‘சுதர்சன சக்கரம்’ எனப் பெயரிடப்பட்டுள்ள இந்த எஸ்-400 ஏவுகணை அமைப்பு, வான்வெளியில் எதிரிகளின் நடமாட்டத்தைத் தடுத்து ‘நோ-ஃபிளை ஜோன்’ (No-Fly Zone) உருவாக்கும் பேராற்றல் கொண்டது. இதன் சக்திவாய்ந்த ராடார்கள் 600 கிலோமீட்டர் தொலைவில் உள்ள இலக்குகளைக் கண்காணிப்பதோடு, 400 கிலோமீட்டர் தூரத்திலேயே எதிரிகளின் போர் விமானங்கள், ட்ரோன்கள் மற்றும் விண்கலங்களை நடுவானில் துல்லியமாகத் தாக்கி அழிக்கும் திறன் படைத்தவை.

ஒரே நேரத்தில் 36 இலக்குகளைத் தாக்கும் வல்லமை கொண்ட இந்த நடமாடும் ஏவுகணை அமைப்பை, வெறும் 5 நிமிடங்களுக்குள் எங்கு வேண்டுமானாலும் போருக்குத் தயார்படுத்திவிட முடியும். பாதுகாப்புத் துறையில் சுயசார்பை எட்ட இந்தியா ‘மேக் இன் இந்தியா’ திட்டத்தின் கீழ் உள்நாட்டு உற்பத்தியைப் பெருக்கி வந்தாலும், தற்போதைய எல்லைப் பாதுகாப்புச் சூழலைக் கருத்தில் கொண்டு, இந்த கூடுதல் ஏவுகணைகளை வாங்குவதற்கு பாதுகாப்பு அமைச்சகம் ஒப்புதல் அளித்துள்ளதாகப் பாதுகாப்புத் துறை வட்டாரங்கள் தெரிவிக்கின்றன.