திருவள்ளூர் மாவட்டத்தில் தேர்தல் பிரச்சாரத்தில் ஈடுபட்ட அதிமுக பொதுச்செயலாளர் எடப்பாடி பழனிசாமி, திரையுலகினரை நம்பி வாக்களிப்பது வீணானது என்று இளைஞர்களுக்கு வேண்டுகோள் விடுத்துள்ளார். சினிமாவில் காட்டப்படும் சாகசங்கள் கற்பனையானவை என்றும், நிஜ வாழ்க்கையில் அவை சாத்தியமற்றது என்றும் குறிப்பிட்ட அவர், திரைப்படங்களை ரசிப்பதோடு நிறுத்திக்கொள்ள வேண்டும் என்று அறிவுறுத்தினார்.
மேலும் இளைஞர்கள் நாட்டின் வளர்ச்சி குறித்து சிந்தித்து, நாட்டை ஆளும் வல்லமை கொண்டவர்களாக உயர வேண்டும் என்றும், தங்கள் எதிர்காலத்தையும் மாநிலத்தின் வளத்தையும் கருத்தில் கொண்டு வாக்களிக்க வேண்டும் என்றும் அவர் வலியுறுத்தினார்.
மேலும், எம்.ஜி.ஆர் அவர்களையும் தற்போதைய நடிகர்களையும் ஒப்பிடுவது தவறு என்று சுட்டிக்காட்டிய எடப்பாடி பழனிசாமி, எம்.ஜி.ஆர் அவர்கள் நடிக்கும் காலத்திலேயே ஏழை மக்களுக்காகத் தன் சொந்தப் பணத்தைச் செலவழித்தவர் என்றும், இறந்த பின்னரும் தன் சொத்துக்களைப் பொதுச் சேவைக்கு எழுதி வைத்த தெய்வம் என்றும் புகழாரம் சூட்டினார்.
இதனால் பெயரைக் குறிப்பிடாமல் சில நடிகர்களை விமர்சித்த அவர், அரசியலுக்கு யார் வேண்டுமானாலும் வரலாம், ஆனால் வந்த பிறகு தங்களை நம்பியிருக்கும் மக்களைக் கைவிடக் கூடாது என்று பேசினார். அதிமுக அரசு செய்த சாதனைகளை முன்னிறுத்தி, மக்கள் விரோத ஆட்சியை அகற்ற இரட்டை இலைக்கு வாக்களிக்குமாறு அவர் கேட்டுக் கொண்டார்.
