கேரள மாநில சட்டப்பேரவைத் தேர்தல் பிரசாரத்தின் போது பிரதமர் நரேந்திர மோடி இந்திய கிரிக்கெட் வீரர் சஞ்சு சாம்சன் குறித்துப் பேசிய கருத்துகள் தற்போது இணையதளங்களில் பெரும் விவாதத்தை ஏற்படுத்தியுள்ளன. உலகக் கோப்பை கிரிக்கெட் போட்டியின் நாக் அவுட் சுற்றுகளில் சஞ்சு சாம்சன் மிகச் சிறப்பாக விளையாடியதாகப் பிரதமர் பாராட்டு தெரிவித்தார்.
அவர் ஒரு சிறந்த வீரர் என்றும் அணிக்குத் தேவைப்படும் போதெல்லாம் தனது திறமையை வெளிப்படுத்துபவர் என்றும் குறிப்பிட்ட பிரதமர் அதே போன்ற அர்ப்பணிப்புடன் பாஜக தொண்டர்களும் தேர்தல் களத்தில் பணியாற்ற வேண்டும் என்று கேட்டுக் கொண்டார்.
பிரதமரின் இந்தப் பேச்சுக்கு ஒரு தரப்பினர் ஆதரவு தெரிவித்து வரும் நிலையில் மற்றொரு தரப்பினர் இதற்கு எதிர்ப்புத் தெரிவித்து வருகின்றனர். குறிப்பாக சமூக வலைதளங்களில் இது குறித்துக் கருத்துப் பதிவிடும் பலரும் அரசியல் லாபத்திற்காக ஒரு விளையாட்டு வீரரின் பெயரைப் பயன்படுத்துவது முறையற்றது என்று கேள்வி எழுப்பி வருகின்றனர்.
ஒரு கிரிக்கெட் வீரரின் சாதனையைத் தேர்தல் பிரசாரத்துடன் ஒப்பிட்டுப் பேசுவது சர்ச்சையை ஏற்படுத்தியுள்ள நிலையில் இது தொடர்பான விவாதங்கள் தற்போது சூடுபிடித்துள்ளன.
