ஈரான் மீது ‘ஆபரேஷன் 5ஜி’ (Operation 5G) என்ற பெயரில் பிரம்மாண்டமான தரைவழித் தாக்குதலை நடத்த அமெரிக்கா தீவிரமாகத் தயாராகி வருகிறது. இதற்காக ‘யுஎஸ்எஸ் திரிபோலி’ என்ற போர்க்கப்பல் மத்திய கிழக்கு பகுதிக்கு வந்துள்ளதுடன், சுமார் 10,000 துருப்புகளைக் களமிறக்கத் திட்டமிடப்பட்டுள்ளது.

ஐந்து கட்டங்களாகத் திட்டமிடப்பட்டுள்ள இந்த நடவடிக்கையில், முதலில் ஈரானின் கடற்கரையோர இராணுவத் தளங்களை அழித்து, பின் ஹார்முஸ் ஜலசந்தியில் உள்ள தீவுகளைக் கைப்பற்றி, இறுதியாக கமாண்டோக்கள் மூலம் ஈரானுக்குள் ஊடுருவி அந்நாட்டின் உயர்மட்டத் தலைமையைத் தனிமைப்படுத்துவதே அமெரிக்காவின் முக்கிய நோக்கமாகும்.

இருப்பினும், இந்தத் தரைவழிப் போர் அமெரிக்காவிற்கு ஒரு புதிய ‘வியட்நாம்’ அல்லது ‘ஆப்கானிஸ்தான்’ போன்ற பெரும் சவாலாக அமையக்கூடும் என நிபுணர்கள் எச்சரிக்கின்றனர். ஈரான் தனது 1,500 கி.மீ நீளக் கடற்கரையோரம் அதிநவீன ஏவுகணைகள், கடல் ட்ரோன்கள் மற்றும் கண்ணிவெடிகளை நிலைநிறுத்தியுள்ளதுடன், நிலத்தடி சுரங்கப்பாதைகள் மற்றும் கொரில்லாப் போர் முறைகளைப் பயன்படுத்தி அமெரிக்காவிற்குப் பதிலடி கொடுக்கத் தயாராக உள்ளது.

ஈரானிடம் இன்னும் 70 சதவீத ஏவுகணைகள் கையிருப்பில் உள்ளதால், அமெரிக்காவின் இந்தத் திட்டம் தோல்வியடைந்தால் அது மத்திய கிழக்கு பிராந்தியத்தில் ஒரு மிகப்பெரிய அழிவிற்கு வழிவகுக்கும் என்று அஞ்சப்படுகிறது.