உக்ரைன் உடனான நீண்டகாலப் போர் காரணமாக ஏற்பட்டுள்ள நிதி நெருக்கடியைச் சமாளிக்க, ரஷ்யா தனது கையிருப்பில் உள்ள தங்கத்தை சுமார் 25 ஆண்டுகளுக்குப் பிறகு முதல்முறையாக விற்பனை செய்யத் தொடங்கியுள்ளது. கடந்த 2026 ஜனவரி மற்றும் பிப்ரவரி ஆகிய இரண்டு மாதங்களில் மட்டும் சுமார் 14 டன் தங்கத்தை ரஷ்யா விற்றுள்ளது.

வழக்கமாக டாலருக்கு மாற்றாகத் தங்கத்தைச் சேமித்து வைக்கும் கொள்கையைக் கொண்டிருந்த ரஷ்யா, தற்போது போருக்கான செலவுகள் அதிகரித்ததாலும், பட்ஜெட்டில் ஏற்பட்டுள்ள பற்றாக்குறையை ஈடுகட்டவும் இந்த அதிரடி முடிவை எடுத்துள்ளது.

சர்வதேச சந்தையில் தற்போது தங்கத்தின் விலை ஒரு அவுன்ஸ் 5,000 டாலரைத் தாண்டியுள்ளதால், இந்தச் சூழலைப் பயன்படுத்தி அதிக லாபம் ஈட்ட ரஷ்யா முயல்கிறது. எண்ணெய் மற்றும் எரிவாயு ஏற்றுமதி மூலம் கிடைத்து வந்த வருமானம் குறைந்துள்ள நிலையில், தங்கம் விற்பனை அந்நாட்டிற்கு உடனடிப் பணப்புழக்கத்தைத் தருகிறது.

ரஷ்யாவிடம் இன்னும் 2,000 டன்களுக்கும் அதிகமான தங்கம் கையிருப்பில் இருந்தாலும், தொடர்ந்து போர்ச் செலவுகள் அதிகரித்தால் வரும் காலங்களில் இன்னும் கூடுதல் தங்கத்தை விற்க வேண்டிய கட்டாயம் அந்நாட்டிற்கு ஏற்படும் என நிபுணர்கள் கருதுகின்றனர்.