செங்கல்பட்டு மாவட்டத்தைச் சேர்ந்த சிவகுருநாதன் (28) என்ற வாலிபர், கூடலூர்-ஊட்டி தேசிய நெடுஞ்சாலையில் உள்ள ஊசிமலை காட்சிமுனை பகுதியில் தடையை மீறி ஆபத்தான இடத்திற்குச் சென்று செல்பி எடுக்க முயன்றபோது எதிர்பாராதவிதமாக 150 அடி ஆழ பள்ளத்தில் விழுந்தார். பலத்த காயமடைந்த அவர், அருகில் இருந்த சுற்றுலாப் பயணிகளுக்குத் தெரியாத நிலையில், தனது செல்போன் மூலம் தான் தங்கியிருந்த விடுதிக்குத் தகவல் அளித்தார்.

உடனடியாக விரைந்து வந்த போலீசார், தீயணைப்புத் துறையினர் மற்றும் வனத்துறையினர் டிரோன் மூலம் அவர் உயிருடன் இருப்பதை உறுதி செய்தனர். இரவு நேரம் மற்றும் வனவிலங்குகள் நடமாட்டம் காரணமாகப் பாதுகாப்புக்காகத் தீ மூட்டப்பட்டு, மீட்புப் பணிகள் தீவிரப்படுத்தப்பட்டன.

நீலகிரி எம்.பி. ஆ.ராசா அவர்களின் வேண்டுகோளின்படி, குன்னூர் வெலிங்டன் ராணுவ மையத்திலிருந்து வந்த மீட்புக் குழுவினர் இரவு 10 மணி முதல் மீட்புப் பணியில் ஈடுபட்டனர். பள்ளத்தில் விழுந்த வாலிபர் படுகாயமடைந்திருந்ததால், மிகுந்த எச்சரிக்கையுடன் சுமார் 12 மணி நேரப் போராட்டத்திற்குப் பிறகு அவர் பாதுகாப்பாக மீட்கப்பட்டார்.

தற்போது மருத்துவமனையில் அனுமதிக்கப்பட்டு தீவிர சிகிச்சை பெற்று வருகிறார். சுற்றுலாப் பயணிகள் ஆபத்தான பகுதிகளில் எச்சரிக்கையுடன் இருக்க வேண்டும் என்பதை இந்தச் சம்பவம் மீண்டும் வலியுறுத்தியுள்ளது.