ஈரான் மீது அமெரிக்கா மற்றும் இஸ்ரேல் படைகள் கடந்த பிப்ரவரி 28-ஆம் தேதி நடத்திய அதிரடித் தாக்குதலைத் தொடர்ந்து, மத்திய கிழக்கில் போர் பதற்றம் உச்சகட்டத்தை எட்டியுள்ளது. இன்றுடன் போர் தொடங்கி 18 நாட்கள் நிறைவடைந்த நிலையிலும், இரு தரப்பும் பின்வாங்குவதாகத் தெரியவில்லை.

பிப்ரவரி 28 அன்று அமெரிக்க-இஸ்ரேல் கூட்டுப் படைகள் நடத்திய தாக்குதலில் ஈரானின் உயர்மட்டத் தலைவர் கொல்லப்பட்டதாகக் கூறப்படுகிறது. இதற்குப் பதிலடியாக, அண்டை நாடுகளில் உள்ள அமெரிக்க ராணுவத் தளங்கள் மீது ஈரான் ஏவுகணைத் தாக்குதல்களை நடத்தியது.

உலக நாடுகளின் போர் நிறுத்தக் கோரிக்கைகளுக்கு மத்தியிலும் தாக்குதல்கள் தொடர்ந்து வருகின்றன. இதற்கிடையில், இந்த விவகாரத்தில் அமெரிக்க அதிபர் டொனால்ட் ட்ரம்ப் பின்னடைவைச் சந்தித்து வருவதாக அரசியல் நோக்கர்கள் கருதுகின்றனர். குறிப்பாக, சர்வதேச வர்த்தகத்திற்கு மிக முக்கியமான ஹார்முஸ் ஜலசந்தியை பாதுகாப்பானதாக மாற்ற அமெரிக்கா விடுத்த கோரிக்கையை ஏனைய நாடுகள் நிராகரித்துள்ளன. இந்தப் போரிலிருந்து விலகி இருக்கவே உலக நாடுகள் விரும்புவதால், அமெரிக்கா தனித்து விடப்பட்டுள்ளதாகத் தெரிகிறது.

போரில் தனக்கு ஆதரவாகச் செயல்பட சீனாவிற்கு அதிபர் ட்ரம்ப் அழுத்தம் கொடுத்து வருகிறார். இருப்பினும், ஈரானுக்கு எதிராகப் போரில் இறங்கும் ட்ரம்ப்பின் முடிவு தவறானது எனப் பல தரப்பிலிருந்து விமர்சனங்கள் எழுந்துள்ளன.

ஈரானின் முக்கிய எரிசக்தி நிலையங்களைக் குறிவைத்து அமெரிக்கா நடத்திய தாக்குதலுக்குப் பதிலடியாக, தங்களோடு தொடர்புடைய நிறுவனங்களைத் தகர்ப்போம் என ஈரான் எச்சரித்துள்ளது. ஈரான் ஹார்முஸ் ஜலசந்தியை மூடியுள்ளதால், உலக சந்தையில் கச்சா எண்ணெய் விலை வரலாறு காணாத அளவில் உயர்ந்துள்ளது. இது உலகப் பொருளாதாரத்தில் பெரும் தாக்கத்தை ஏற்படுத்தியுள்ளது.

ஈரானின் ராணுவ பலம் குறைந்துவிட்டதாகவும், அவர்களால் ஹார்முஸ் ஜலசந்தியில் எதையும் செய்ய முடியாது என்றும் ட்ரம்ப் கூறி வந்த நிலையில், ஈரானின் அதிரடித் தாக்குதல் அமெரிக்காவிற்கு பெரும் அதிர்ச்சியை அளித்துள்ளது. ஹார்முஸ் ஜலசந்தியில் சென்றுகொண்டிருந்த அமெரிக்க எண்ணெய் கப்பல் ஒன்றிற்கு ஈரான் படைகள் தீ வைத்துள்ளன.

“ஹார்முஸ் ஜலசந்தி பாதுகாப்பானது” என உலக நாடுகளுக்கு உத்தரவாதம் அளித்த அமெரிக்காவிற்கே இது பெரும் அவமானமாகப் பார்க்கப்படுகிறது. மேலும், “துணிச்சலிருந்தால் உங்கள் போர்க்கப்பல்களை ஹார்முஸ் பகுதிக்குள் கொண்டு வாருங்கள்” என ஈரான் வெளிப்படையாகவே அமெரிக்காவிற்கு சவால் விடுத்துள்ளது.

மேலும்  தற்போது நிலவும் இந்தச் சூழலில், அமெரிக்கா தனது அடுத்தகட்ட ராணுவ நடவடிக்கையைத் தீவிரப்படுத்துமா அல்லது பேச்சுவார்த்தைக்கு முன்வருமா என்பது உலக நாடுகளிடையே பெரும் கேள்வியாக எழுந்துள்ளது.