தமிழகத்தில் ஆளுங்கட்சியான திராவிட முன்னேற்றக் கழகத்தை மீண்டும் ஆட்சிக்கு வரவிடாமல் தடுப்பதே தனது லட்சியம் என்று தமிழக வெற்றிக் கழகத் தலைவர் விஜய் கூறி வருகிறார். இது உண்மையாக இருக்கும் பட்சத்தில் அவர் வரும் தேர்தலில் அனைத்திந்திய அண்ணா திராவிட முன்னேற்றக் கழகம் மற்றும் பாரதிய ஜனதா கட்சி ஆகியவற்றுடன் இணைந்து ஒரு வலுவான கூட்டணியை உருவாக்க முன்வர வேண்டும் என்று தமிழக பாரதிய ஜனதா கட்சியின் மாநிலச் செய்தித் தொடர்பாளர் பிரசாத் அறிக்கை வெளியிட்டுள்ளார்.
ஆட்சி அதிகாரம் மற்றும் முதல்வர் பதவி யாருக்கு என்பன போன்ற தனிப்பட்ட விருப்பு வெறுப்புகளை விட தற்போதைய நிலையில் யார் முதல்வராக வரக்கூடாது என்பதில் தான் எதிர்க்கட்சிகளின் கவனம் இருக்க வேண்டும் என்றும் அவர் தனது அறிக்கையில் சுட்டிக்காட்டியுள்ளார்.
திராவிட முன்னேற்றக் கழகத்தை வெற்றி பெறச் செய்யும் மறைமுக முயற்சிக்கு விஜய் எக்காரணம் கொண்டும் துணை போகக் கூடாது என்று அறிவுறுத்தியுள்ள பிரசாத் தமிழக மக்களின் நலன் காக்க விஜய் ஒரு சரித்திர நாயகனாக மாற வருமாறு அழைப்பு விடுத்துள்ளார். மக்கள் நலன் போற்றும் அரசியல்வாதியாக இந்தத் தேர்தலில் தேசிய ஜனநாயகக் கூட்டணியில் இணையுமாறு அவர் விஜய்க்கு வேண்டுகோள் விடுத்துள்ளார்.
அவ்வாறு இணையும் பட்சத்தில் விஜய்க்கான தகுதியான இடத்தை தேசிய ஜனநாயகக் கூட்டணி நிச்சயம் வழங்கும் என்றும் அவர் உறுதி அளித்துள்ளார். திராவிட முன்னேற்றக் கழகத்தை வீழ்த்தக்கூடிய இந்த அரசியல் போர்க்களத்தில் துணிச்சலான முடிவை எடுக்க வேண்டியது காலத்தின் கட்டாயம் என்று அவர் தனது அறிக்கையின் வாயிலாக வலியுறுத்தியுள்ளார்.
