பாஜகவின் அரசியல் அணுகுமுறைகளைக் கடுமையாக விமர்சித்துள்ள நடிகர் சத்யராஜின் மகளும், மருத்துவருமான திவ்யா சத்யராஜ், “மக்கள் விரோதிகளின் கடைசி ஆயுதம் தேசப்பற்று” எனத் தெரிவித்துள்ளார். மக்களின் அடிப்படைப் பிரச்சினைகளான வேலையில்லாத் திண்டாட்டம் மற்றும் விலைவாசி உயர்வு போன்றவற்றைத் தீர்ப்பதில் கவனம் செலுத்தாமல், உணர்ச்சிகரமான தேசப்பற்றை முன்னிறுத்தி மக்களை திசைதிருப்புவதாக அவர் குற்றம் சாட்டியுள்ளார்.
மேலும் உண்மையான தேசப்பற்று என்பது மக்களின் நலனில் அக்கறை கொள்வதே தவிர, அதை அரசியலுக்காகப் பயன்படுத்துவது அல்ல என்பதை அவர் தனது கண்டனத்தின் வாயிலாகத் தெளிவுபடுத்தியுள்ளார். சமூக வலைதளங்களில் வைரலாகி வரும் இவரது இந்த அறிக்கை, அரசியல் வட்டாரத்தில் பெரும் விவாதத்தைக் கிளப்பியுள்ளது.
இந்நிலையில் அரசுக்கு எதிராகக் கேள்வி கேட்பவர்களைத் தேசத் துரோகிகளாகச் சித்தரிக்கும் போக்கைச் சுட்டிக்காட்டிய திவ்யா சத்யராஜ், ஜனநாயக நாட்டில் விமர்சனங்கள் ஆரோக்கியமானவை என்றும் குறிப்பிட்டுள்ளார். ஏற்கனவே பல்வேறு சமூகப் பிரச்சனைகளில் தனது கருத்துக்களைத் துணிச்சலாகப் பதிவு செய்து வரும் அவர், தற்போது நேரடியாகப் பாஜகவின் அரசியல் பாணியை விமர்சித்துள்ளது குறிப்பிடத்தக்கது.
