நாளை ஜனவரி 23, செங்கல்பட்டு மாவட்டம் மதுராந்தகத்தில் தேசிய ஜனநாயகக் கூட்டணியின் (NDA) பிரம்மாண்ட தேர்தல் மாநாடு நடைபெற உள்ளது. இதில் பிரதமர் நரேந்திர மோடி அவர்கள் நேரில் பங்கேற்று, 2026 சட்டமன்றத் தேர்தலுக்கான பிரச்சாரத்தை அதிகாரப்பூர்வமாகத் தொடங்கி வைக்கிறார். எடப்பாடி பழனிசாமி தலைமையிலான அதிமுகவும், பாஜகவும் கைகோர்த்து நிற்கும் இந்த மேடையில், கூட்டணிக் கட்சிகளின் தலைவர்கள் அனைவரும் ஒன்றாக அணிவகுத்து நிற்கப்போகிறார்கள். 2017-க்குப் பிறகு ஈபிஎஸ் மற்றும் டிடிவி தினகரன் ஆகியோர் ஒரே மேடையில் மோடியுடன் தோன்றுவதுதான் இந்த மாநாட்டின் ஹைலைட்!
மாநாட்டுக்கு ஒரு நாள் முன்னதாக, இன்று (ஜனவரி 22) ஒரு முக்கிய அறிவிப்பு வெளியாகியுள்ளது. ஏ.சி. சண்முகம் தலைமையிலான புதிய நீதிக்கட்சி, பாஜக – அதிமுக கூட்டணியில் இணைந்துள்ளதாக அதிகாரப்பூர்வமாக அறிவிக்கப்பட்டுள்ளது. ஏற்கனவே டிடிவி தினகரனின் அமமுக, அன்புமணி ராமதாஸின் பாமக மற்றும் பாரிவேந்தரின் ஐஜேகே ஆகிய கட்சிகள் கூட்டணியில் உறுதியாகியுள்ள நிலையில், ஏ.சி. சண்முகத்தின் வருகை முதலியார் மற்றும் பிள்ளைமார் சமூக வாக்குகளைக் குறிவைத்து ஒரு பலமான நகர்வாகப் பார்க்கப்படுகிறது.
