கேரளா மாநிலம் கண்ணூரில் உள்ள ஜவஹர் மைதானத்திற்கு வெளியே கடந்த 30 ஆண்டுகளாகக் கரும்புச் சாறு கடை நடத்தி வருபவர் 67 வயதான ஹாஷிம். ஒரு சாதாரண தெருவோர வியாபாரியாகத் தெரிந்தாலும், ஹாஷிம் தனது சிறு சேமிப்பின் மூலம் இன்று ஒரு உலகப் பயணியாக உருவெடுத்துள்ளார். பயணங்களின் மீது கொண்ட தீராத காதலால், இதுவரை இஸ்ரேல், பாலஸ்தீனம், எகிப்து, துருக்கி, சவுதி அரேபியா என மொத்தம் 10 நாடுகளுக்குத் தனது மனைவியுடன் சென்று வந்துள்ளார். வியாபாரம் குறைவாக இருக்கும் ஜூன், ஜூலை மாதங்களில் கடையை மூடிவிட்டு வீட்டிலிருக்காமல், புதிய இடங்களைக் காணச் செல்வதையே இவர் வழக்கமாகக் கொண்டுள்ளார்.

​2012-ம் ஆண்டு டெல்லிக்குச் சென்றதுதான் இவரது முதல் நீண்ட பயணம். ஆரம்பத்தில் தனது அண்ணனின் ஊக்கத்தால் பயணங்களைத் தொடங்கிய ஹாஷிம், இப்போது அடுத்ததாக சீனாவுக்குச் செல்லத் திட்டமிட்டுள்ளார். வெறும் கரும்புச் சாறு விற்று வரும் வருமானத்தை வைத்தே, எவ்வித ஆடம்பரமும் இன்றி உலக நாடுகளைச் சுற்றி வரும் இவரது ஆர்வம் பலரையும் வியப்பில் ஆழ்த்தியுள்ளது. “பயணங்கள் நமக்கு நிறைய பாடங்களைக் கற்றுத் தருகின்றன” என்று கூறும் ஹாஷிம், வயது ஒரு தடையல்ல என்பதைத் தனது விடாமுயற்சியால் நிரூபித்து வருகிறார்.