கோவை மாவட்ட ஆட்சியர் அலுவலகத்திற்கு இன்று காலை மின்னஞ்சல் (E-mail) வாயிலாக மீண்டும் ஒரு வெடிகுண்டு மிரட்டல் விடுக்கப்பட்டது. இது கடந்த சில மாதங்களில் விடுக்கப்படும் 23-வது மிரட்டலாகும். இதனால் அதிர்ச்சியடைந்த அதிகாரிகள் உடனடியாக காவல்துறைக்குத் தகவல் தெரிவித்தனர். இதனைத் தொடர்ந்து, மோப்ப நாய்கள் மற்றும் வெடிகுண்டு நிபுணர்கள் அலுவலக வளாகம் முழுவதும் தீவிர சோதனையில் ஈடுபட்டனர். வாகன நிறுத்துமிடம், பழைய மற்றும் புதிய கட்டிடங்கள் என அனைத்து இடங்களிலும் தேடிய பிறகு, இது ஒரு வெறும் புரளி என்பது உறுதி செய்யப்பட்டது.
தொடர்ந்து 23 முறை இது போன்ற மிரட்டல்கள் விடுக்கப்படுவது மாவட்ட நிர்வாகம் மற்றும் பொதுமக்களிடையே பெரும் பரபரப்பை ஏற்படுத்தியுள்ளது. ஒவ்வொரு முறையும் சோதனை நடத்தப்பட்டு மிரட்டல் பொய்யெனத் தெரிந்தாலும், மிரட்டல் விடுபவர் யார் என்பது இதுவரை கண்டறியப்படவில்லை. தற்போது, இந்தச் செயலில் ஈடுபடும் நபரைப் பிடிக்க சைபர் கிரைம் போலீசார் தீவிரமாக விசாரணை நடத்தி வருகின்றனர்.
