தமிழக பாஜக மாநிலத் தலைவர் நயினார் நாகேந்திரன், 2026 சட்டமன்றத் தேர்தலை முன்னிட்டு ‘தமிழகம் தலை நிமிர, தமிழனின் பயணம்’ என்ற மாநிலம் தழுவிய பிரசாரப் பயணத்தை மேற்கொண்டு வருகிறார்.

இந்தப் பயணத்தின் ஒரு பகுதியாக நேற்று (டிசம்பர் 28) நீலகிரி மாவட்டம் ஊட்டிக்கு வருகை தந்த அவருக்கு, மாவட்ட பாஜக சார்பில் உற்சாக வரவேற்பு அளிக்கப்பட்டது. பின்னர் ஊட்டி ஏ.டி.சி. மைதானத்தில் நடைபெற்ற பிரசார பொதுக்கூட்டத்தில் முன்னாள் மாநிலத் தலைவர் அண்ணாமலை மற்றும் மத்திய இணை அமைச்சர் எல்.முருகன் ஆகியோருடன் இணைந்து அவர் பங்கேற்றார்.

அப்போது செய்தியாளர்களிடம் பேசிய நயினார் நாகேந்திரன், வரும் சட்டமன்றத் தேர்தலில் அதிமுக – பாஜக கூட்டணி குறைந்தபட்ச பொதுச் செயல்திட்டத்தை உருவாக்கி, தமிழகத்தில் ஆட்சியைப் பிடிப்பது உறுதி என்று திட்டவட்டமாகத் தெரிவித்தார்.

பாஜகவுடன் கூட்டணி வைப்பதால் அதிமுக அழிந்துவிடும் என்று பரப்பப்படும் விமர்சனங்களுக்குப் பதிலளித்த அவர், “அதிமுக குறித்து மற்ற கட்சிகள் கவலைப்படத் தேவையில்லை; நாங்கள் யாரையும் மிரட்டி எங்களது கூட்டணியில் சேர்க்கவில்லை” என்று ஆவேசமாகக் குறிப்பிட்டார். மேலும், திமுக கூட்டணி பலமாக இருப்பதாக ஒரு மாயையைத் திராவிட முன்னேற்றக் கழகம் உருவாக்கி வருவதாகவும், ஆனால் உண்மையில் அக்கட்சிகளுக்குள் பெரும் சலசலப்பு நிலவி வருவதாகவும் அவர் விமர்சித்தார்.

2026-இல் தேசிய ஜனநாயகக் கூட்டணி மாபெரும் வெற்றி பெற்றுத் தமிழகத்தில் மாற்றத்தை ஏற்படுத்தும் என்றும் அவர் நம்பிக்கை தெரிவித்தார். தமிழகத்தின் அரசியல் களம் தேர்தல் ஜூரத்தை எட்டியுள்ள நிலையில், நயினார் நாகேந்திரனின் இந்தத் துணிச்சலான பேச்சு அரசியல் வட்டாரத்தில் பெரும் விவாதத்தை ஏற்படுத்தியுள்ளது.