2025-ஆம் ஆண்டு உலக அரசியலில் மிகப்பெரிய மாற்றங்களையும் அதிரடியான ஆட்சி கவிழ்ப்புகளையும் சந்தித்த ஆண்டாக வரலாற்றில் இடம்பிடித்துள்ளது. ஆண்டின் தொடக்கத்தில் அமெரிக்காவின் 47-வது அதிபராக டொனால்ட் ட்ரம்ப் பதவியேற்றது முதல் உலகளாவிய வர்த்தகம் மற்றும் குடியேற்றக் கொள்கைகளில் பெரும் பரபரப்பு ஏற்பட்டது.

ஐரோப்பாவின் வல்லரசு நாடான ஜெர்மனியில் ஆளும் கூட்டணி அரசு கலைக்கப்பட்டு நடைபெற்ற பொதுத்தேர்தலில் ஓலாப் ஷோல்ஸ் தலைமையிலான கட்சி தோல்வியைத் தழுவியது. பிரீட்ரிக் மெர்ஸ் தலைமையிலான கூட்டணி மகத்தான வெற்றி பெற்று ஜெர்மனியில் புதிய அரசியல் அத்தியாயத்தைத் தொடங்கியது.

இதேபோல் சிரியாவில் கிளர்ச்சியாளர்களின் போராட்டத்தால் நீண்டகால அசாத் ஆட்சி முடிவுக்கு வந்து அகமது அல்-ஷாரா தலைமையில் புதிய இடைக்கால அரசு பொறுப்பேற்றது. ஆசிய நாடுகளிலும் இந்த ஆண்டு ஆட்சி மாற்றங்கள் அதிரடியாக நிகழ்ந்தன. ஜப்பானில் ஆளும் கட்சி சந்தித்த தோல்வியால் ஷிகெரு இஷிபா ராஜினாமா செய்ய சானே தகைச்சி அந்நாட்டின் முதல் பெண் பிரதமராகத் தேர்ந்தெடுக்கப்பட்டு சரித்திரம் படைத்தார்.

நேபாளத்தில் ஊழலுக்கு எதிராக இளைஞர்கள் நடத்திய ஜென்-சி போராட்டங்களால் கம்யூனிஸ்ட் அரசு வீழ்த்தப்பட்டு முன்னாள் நீதிபதி சுஷீலா கார்க்கி தலைமையில் இடைக்கால நிர்வாகம் அமைந்தது. தாய்லாந்தில் எல்லைப் பிரச்சனை தொடர்பான சர்ச்சையில் பெண் பிரதமர் சினவத்ரா நீதிமன்றத்தால் பதவி நீக்கம் செய்யப்பட்டார்.

அவருக்குப் பின் அனுடின் சார்ன்விரகுல் புதிய பிரதமராகப் பொறுப்பேற்றார். பிரான்ஸ் நாட்டைப் பொறுத்தவரை பட்ஜெட் விவகாரத்தால் ஏற்பட்ட நெருக்கடியால் கடந்த இரண்டு ஆண்டுகளில் மட்டும் ஆறு பிரதமர்கள் மாறும் சூழல் ஏற்பட்டு அரசியல் ஸ்திரமின்மை நிலவியது.

ஆப்பிரிக்க மற்றும் லத்தீன் அமெரிக்க நாடுகளிலும் தேர்தல்கள் பெரும் தாக்கத்தை ஏற்படுத்தின. தான்சானியாவில் சாமியா சுலுஹு ஹாசன் இரண்டாவது முறையாக அதிபராகத் தேர்ந்தெடுக்கப்பட்ட நிலையில் அங்கு ஏற்பட்ட வன்முறையில் நூற்றுக்கணக்கானோர் உயிரிழந்தது சோகத்தை ஏற்படுத்தியது. கேமரூனில் பால் பியா மீண்டும் அதிகாரத்தைத் தக்கவைத்துக் கொண்டார்.

கனடா மற்றும் ஆஸ்திரேலியாவில் முறையே மார்க் கார்னி மற்றும் ஆன்டனி அல்பானீஸ் ஆகியோர் புதிய அரசுத் தலைவர்களாகப் பொறுப்பேற்றனர். ஆண்டின் இறுதியில் சிலி நாட்டில் நடைபெற்ற தேர்தலில் வலதுசாரி வேட்பாளர் ஜோஸ் அன்டோனியோ காஸ்ட் வெற்றி பெற்றது உலகளவில் வலதுசாரி கட்சிகளின் எழுச்சியை மீண்டும் உறுதிப்படுத்தியது. ஒட்டுமொத்தமாக இந்த ஆண்டு உலக வரைபடத்தில் பல நாடுகளின் அரசியல் முகவரிகள் மாறியுள்ளன.