கர்நாடக மாநிலம் கார்வார் கடற்படை தளத்தில், முதுகில் மர்மமான ஜிபிஎஸ் (GPS) கருவி பொருத்தப்பட்ட நிலையில் கடல் பறவை ஒன்று சுற்றித் திரிவதை அதிகாரிகள் கண்டறிந்தனர். அந்தப் பறவையைப் பிடித்து அதிகாரிகள் ஆய்வு செய்தபோது, அதில் பொருத்தப்பட்டிருந்த கருவியில் “சீன அறிவியல் அகாடமி” (Chinese Academy of Sciences) என்ற பெயர் பொறிக்கப்பட்டிருந்தது அதிகாரிகளுக்குப் பெரும் அதிர்ச்சியை அளித்துள்ளது. இந்தியாவின் மிகப்பெரிய கடற்படை தளங்களில் ஒன்றான ஐஎன்எஸ் கடம்பா பகுதியில் இத்தகைய கருவியுடன் பறவை கண்டறியப்பட்டது உளவு வேலைகளாக இருக்கலாம் என்ற சந்தேகத்தை வலுப்படுத்தியுள்ளது.
​
இந்தக் கருவி பறவைகளின் இடப்பெயர்வு மற்றும் பருவகால மாற்றங்களைக் கண்டறியும் சாதாரண ஆராய்ச்சிப் பணிகளுக்காகப் பயன்படுத்தப்பட்டதா அல்லது இந்திய கடற்படை தளத்தின் நடமாட்டங்களைக் கண்காணிக்கும் சீன உளவுத்துறையின் சதியா என்ற கோணத்தில் தீவிர விசாரணை நடைபெற்று வருகிறது. பொதுவாக பறவைகள் ஆயிரக்கணக்கான மைல்கள் இடம்பெயரும் தன்மை கொண்டவை என்பதால், இது தற்செயலாக இங்கு வந்ததா அல்லது திட்டமிட்டு அனுப்பப்பட்டதா என்பதை அறிய பாதுகாப்பு முகமைகள் அந்த ஜிபிஎஸ் கருவியிலுள்ள தரவுகளை ஆய்வு செய்து வருகின்றனர்.