புதுக்கோட்டை மாவட்டத்தில், திருமணத்தின் போது மணமகள் ஓடிச் சென்ற சம்பவம் அப்பகுதியில் பெரும் பரபரப்பை ஏற்படுத்தியுள்ளது.

தபால் அலுவலகத்தில் பணியாற்றி வரும் 23 வயதுடைய பெண்ணுக்கும், அரசு ஊழியர் ஒருவருக்கும் இடையே நேற்று (நவ. 23) திருமணம் நடைபெற இருந்தது. மணமகன் குடும்பத்தினர் தாலி கட்டும் நேரத்தில், பெண்ணை மணமேடைக்கு அழைத்து வரச் சென்றபோது, மணமகள் திருமண மண்டபத்தில் இருந்து திடீரென காணாமல் போனது தெரியவந்தது. இந்த எதிர்பாராத நிகழ்வு மணமகன் குடும்பத்தினர் மத்தியில் பெரும் அதிர்ச்சியையும் பதற்றத்தையும் ஏற்படுத்தியது.

​மணமகளைத் தேடும் பணி தீவிரப்படுத்தப்பட்ட நிலையில், மணமகள் தன் தாயாருக்குக் குறுஞ்செய்தி மூலம் ஒரு தகவலை அனுப்பியுள்ளார். அதில், “எனக்கு இந்தத் திருமணம் பிடிக்கவில்லை. அதனால், என்னைத் தேட வேண்டாம்” என்று அவர் தெளிவாகத் தெரிவித்திருந்தார்.

திருமணத்தில் விருப்பம் இல்லாத காரணத்தால் அவர் தானாக முன்வந்து திருமணத்தை நிறுத்திச் சென்றது உறுதி செய்யப்பட்டது. இந்தச் சம்பவம் அப்பகுதியில் உள்ளோர் மத்தியில் பல்வேறு விதமான விவாதங்களையும், சமூகப் பிரச்சினைகள் குறித்த கேள்விகளையும் எழுப்பியுள்ளது.