மும்பையின் பந்த்ரா பகுதியில் 30 வயதுக்கு மேற்பட்ட பெண் ஒருவர் தெருவில் பயங்கரமான பாலியல் தொந்தரவுக்கு ஆளான சம்பவம் அதிர்ச்சியை ஏற்படுத்தியுள்ளது.

ரெடிட் தளத்தில் ‘பந்த்ரா பாதுகாப்பற்றதாக இருக்கும் என்று எதிர்பார்க்கவில்லை’ என்ற தலைப்பில் அவர் பகிர்ந்த பதிவில், மாலை 7:45 மணியளவில், மக்கள் நடமாட்டமுள்ள, நன்கு வெளிச்சமான பெர்ரி கிராஸ் ரோட்டில் உள்ள பீஸ் ஹேவன் பங்களாவுக்கு அருகே, அந்நியர் ஒருவர் திடீரென தன்னை இறுக்கமாக கட்டிப்பிடித்து உரசியதாக குறிப்பிட்டுள்ளார்.

அவர் உடனடியாக கத்தியதால், அந்த நபர் பயந்து விடுவித்து மன்னிப்பு கேட்டதாகவும், ஆனால் அதற்கு முன் தனது கைப்பையால் அவரை அடித்ததாகவும் அவர் தெரிவித்தார்.

இந்த சம்பவம் அவரை உளவியல் ரீதியாக பாதித்தாலும், இது தனது தவறு இல்லை என்று உணர்ந்து, பின்னர் தனது வேலைகளைத் தொடர்ந்தார். கடந்த சில மாதங்களாக, பின்தொடரப்படுவது, மோசமான கமெண்ட்கள் கேட்பது போன்ற தொந்தரவுகள் தொடர்ந்து நடந்து வந்ததாகவும், ஆனால் இந்த சம்பவம் மிகவும் அதிர்ச்சியூட்டுவதாக இருந்ததாகவும் அவர் கூறினார்.