மத்திய பிரதேசத்தின் சாகர் மாவட்டத்தில் உள்ள குராய் கிராமத்தில் நடந்த ஒரு வினோத சம்பவம், அப்பகுதி மக்களையும் போலீசாரையும் அதிர்ச்சியில் ஆழ்த்தியுள்ளது. சாலையோர சகதியில் குப்புற விழுந்து 6 மணி நேரமாக அசைவற்று கிடந்த ஒரு இளைஞரை, பிணம் என்று நினைத்த கிராம மக்கள், உடனடியாக போலீசுக்கு தகவல் கொடுத்தனர்.

பிணத்தை அகற்ற வாகனத்துடன் சம்பவ இடத்திற்கு விரைந்த போலீசார், அந்த நபரைப் புரட்ட முயன்றபோது, திடீரென அவர் எழுந்து, “நான் இன்னும் உயிரோடு இருக்கிறேன்!” என்று கூறியது அனைவரையும் திகைப்பில் ஆழ்த்தியது. அவரது முகம் சகதியால் மூடப்பட்டு, அடையாளம் காண முடியாத நிலையில் இருந்ததால், சிலர் பயத்தில் அங்கிருந்து ஓடிவிட்டனர்.

விசாரணையில், அந்த இளைஞர் அதிகமாக மது அருந்திவிட்டு, இருசக்கர வாகனத்தில் வந்து கொண்டிருந்தபோது, சிறுநீர் கழிக்க நிறுத்தியதாகவும், அப்போது தடுமாறி சகதியில் விழுந்ததாகவும் தெரிவித்தார். போதையின் காரணமாக எழுந்திருக்க முடியவில்லை என்றும் அவர் கூறினார்.

இதை நேரில் பார்த்த ஒரு கிராமவாசி, “இப்படி ஒரு சம்பவத்தை இதற்கு முன் பார்த்ததில்லை. பிணம் என்று நினைத்தோம், ஆனால் அவர் திடீரென எழுந்து பேசியபோது, பேய் வந்துவிட்டதாக பயந்துவிட்டோம்!” என்றார். போலீசார் அவருக்கு ஆலோசனை வழங்கி, பத்திரமாக அனுப்பி வைத்தனர். இந்த “பிணம் உயிரோடு எழுந்த” சம்பவம், மாவட்டம் முழுவதும் பேசுபொருளாக மாறியுள்ளது.