டெல்லியின் கன்னாட் பிளேஸ் பகுதியில் நடந்த பார்க்கிங் “ஊழல்” ஒன்றை அம்பலப்படுத்திய டெல்லி வாசியின் ரெடிட் பதிவு, சமூக வலைதளங்களில் பரபரப்பை ஏற்படுத்தியுள்ளது. “கன்னாட் பிளேஸ் பார்க்கிங்கில் ஊழல் எச்சரிக்கை” என்ற தலைப்பில் பதிவிட்ட அந்த நபர், பார்க்கிங் கட்டணத்தில் முறைகேடு செய்ய முயன்றதாக குற்றம்சாட்டினார்.

“நான் கன்னாட் பிளேஸில் வாகனம் நிறுத்தியபோது, பார்க்கிங் கட்டணம் மணிக்கு 100 ரூபாய் என்று கூறினர், ஆனால் உண்மையான கட்டணம் மணிக்கு 50 ரூபாய் மட்டுமே. பார்க்கிங் ஸ்லிப்பில் அதிகாரப்பூர்வ கட்டணம் குறிப்பிடப்பட்ட பகுதி நீக்கப்பட்டிருந்தது,” என அவர் விவரித்தார்.

மேலும், அவர் மூன்று மணிக்கு வாகனம் நிறுத்தியிருந்தாலும், ஸ்லிப்பில் 2:13 மணி என குறிப்பிடப்பட்டு, கூடுதல் கட்டணம் வசூலிக்க முயன்றதாகவும் கூறினார்.

இந்த முறைகேட்டை எதிர்கொண்டபோது, பார்க்கிங் ஊழியர் பதற்றமடைந்து, “புதிதாக வேலைக்கு சேர்ந்தேன், இனி இப்படி செய்யமாட்டேன்” என சமாளிக்க முயன்றதாக அந்த நபர் தெரிவித்தார்.

“எனது நண்பர்களும் இதேபோன்ற ஊழலை கன்னாட் பிளேஸில் சந்தித்துள்ளதால், எப்போதும் ஸ்லிப்பை சரிபார்த்து பணம் செலுத்துங்கள்,” என அவர் மற்றவர்களுக்கு எச்சரிக்கை விடுத்தார்.

இந்தப் பதிவு வைரலானதைத் தொடர்ந்து, பலர் தங்களது அனுபவங்களை பகிர்ந்தனர். ஒருவர், “பார்க்கிங் கட்டணம் இப்போது 50 ரூபாயா? ஒரு மாதத்திற்கு முன்பு வரை 40 ரூபாயாக இருந்தது,” என கேள்வி எழுப்பினார்.

மற்றொருவர், “ஒருமுறை என் ஸ்லிப்பில் மணிக்கு 150 ரூபாய் என எழுதியிருந்தனர், ஆனால் வாகன எண்ணை சரிபார்த்ததால், 50 ரூபாய்க்கு சரியான ஸ்லிப் வாங்கினேன்,” என பகிர்ந்தார்.

இதுபோன்ற முறைகேடுகளைத் தவிர்க்க, கணினிமயமாக்கப்பட்ட பார்க்கிங் ஸ்லிப்புடன் பணம் செலுத்தியதற்கான ரசீதையும் கேட்க வேண்டும் என பயனர்கள் அறிவுறுத்துகின்றனர்.