திருவண்ணாமலை மாவட்டத்தை சேர்ந்த 26 வயது பெண், கடந்த 2015ம் ஆண்டு முதல் 2020 ஆம் ஆண்டு வரை சென்னையில் உள்ள ஒரு பிரபல துணிக்கடையில் வேலை பார்த்து வந்தார். அங்கே மேற்பார்வையாளராக பணியாற்றிய தஞ்சாவூர் மாவட்டம் திருவிடைமருதூர் தாலுகா கயலூர் கிராமத்தைச் சேர்ந்த திருநாவுக்கரசு (30) என்பவருடன் இவர் நெருக்கமாக பழகி, காதலிலும் ஈடுபட்டார். திருமணம் செய்வதாக உறுதி அளித்த திருநாவுக்கரசு, இப்பெண்ணுடன் உல்லாசமாக இருந்ததாக கூறப்படுகிறது.

கொரோனா தொற்று பரவலால் வேலைக்கு இடைநிறுத்தம் அளிக்கப்பட்ட நிலையில் இருவரும் தங்களது சொந்த ஊர்களுக்கு திரும்பினர். இதற்குப் பிறகு அந்த பெண் கர்ப்பம் தரித்து, 2021ஆம் ஆண்டு ஒரு ஆண் குழந்தை பிறந்தது. குழந்தை பிறந்ததும், திருநாவுக்கரசு வந்து பார்த்ததோடு, “திருமணம் செய்து கொள்கிறேன்” என மீண்டும் வாக்குறுதி அளித்துள்ளார்.

அதற்குப் பிறகு திருநாவுக்கரசு திடீரென காணாமல் போனார். தொலைபேசியிலும் தொடர்பு கொள்ள முடியாத நிலை உருவானது. வாழ்க்கை முழுக்க அவரை நம்பி இருந்த பெண்ணுக்கு இது பெரும் அதிர்ச்சியாக அமைந்தது. இதையடுத்து, பாதிக்கப்பட்ட பெண் திருவண்ணாமலை வந்தவாசி மகளிர் காவல்நிலையத்தில் புகார் அளித்தார்.

இந்த புகாரைத் தொடர்ந்து, மகளிர் காவல் ஆய்வாளர் மங்கையர்க்கரசி தலைமையில், சப்-இன்ஸ்பெக்டர் சாந்தி, குற்றப்பிரிவு சப்-இன்ஸ்பெக்டர் முருகன் ஏட்டு அன்பழகன் ஆகியோர் நடவடிக்கையில் ஈடுபட்டனர். அவர்கள் அண்மையில் தஞ்சாவூர் மாவட்டம் சென்று, திருநாவுக்கரசுவை கைது செய்து விசாரணைக்கு உட்படுத்தினர். தற்போது இந்த விவகாரம் திருவண்ணாமலை மாவட்டத்தில் பெரும் பரபரப்பை ஏற்படுத்தியுள்ளது.