கடலூர் மாவட்டம் புவனகிரி அருகே உள்ள நத்தமேடு கிராமத்தில், தனியாக வசித்து வந்த மூதாட்டி சந்திரா, தன்னுடைய வீட்டில் மர்மமான முறையில் கொலை செய்யப்பட்ட சம்பவம் மாநிலம் முழுவதும் அதிர்ச்சியை ஏற்படுத்தியுள்ளது.

வெளியூரில் வசிக்கும் அவரது மகள் தீபலட்சுமி, தாயிடம் எப்போதும் போல் தொலைபேசியில் அழைத்தும் பதிலில்லாததால் பதட்டமடைந்து, பக்கத்து வீட்டிலுள்ள பெண்ணிடம் அம்மாவை பார்த்து சொல்ல கேட்டிருந்தார். அந்த பெண் தனது கணவருடன் சந்திராவின் வீட்டிற்குச் சென்று பார்த்தபோது, கதவுகள் திறக்கப்படவில்லை. பின்னர் பின்வாசல் வழியாக நுழைந்த அவர்கள், சந்திரா முகத்தில் ரத்தத்துடன்  அழுகிய நிலையில் சடலமாக கிடப்பதை பார்த்து பதறி, உடனடியாக  போலீசுக்கும் தகவல் தெரிவித்தனர்.

பின்னர் சம்பவ இடத்திற்கு வந்த போலீசார், சந்திராவின் மூக்கில் இருந்து இரத்தம் வடிந்த நிலையில் அவரது சடலத்தை மீட்டு, பிரேத பரிசோதனைக்காக அனுப்பினர். அதே நேரத்தில், சந்திராவின் கழுத்தில் இருந்த இரண்டரை சவரன் தங்கச் செயினும், மூக்குத்தியும் காணவில்லை என்பதை மகள் தீபலட்சுமி தெரிவித்தார்.

இது நகைக்காக நடைபெற்ற கொள்ளையுடன் கூடிய கொலை என போலீசாருக்கு சந்தேகம் எழுந்தது. இதற்கிடையில், போலீசார் சிசிடிவி கேமரா பதிவுகளைச் சரிபார்த்தபோது, சந்திராவின் வீட்டிற்குள் வெளியினர் யாரும் நுழைந்த தடயமே இல்லை என்பது உறுதியானது. சந்திரா தனியாகவே வீட்டில் வசித்ததால், சந்தேகம் பக்கத்து வீட்டில் வசிக்கும் 29 வயது பசுபதி மீது திரும்பியது.

பசுபதியிடம் ஆரம்பத்தில் சாதாரணமாக விசாரணை மேற்கொண்ட போலீசாரிடம், “நான் அந்த வீட்டுக்குப் போவே இல்ல சார்… என்னை ஏன் விசாரணைக்கு அழைக்கிறீங்க?” என பதட்டமாக பதிலளித்தார். ஆனால் அவரது முகத்தில் தெரிந்த பதட்டமும், இடையீடு கேள்விகளில் தடுமாறிய பதில்களும் காவல்துறையின் சந்தேகத்தை அதிகரிக்கச் செய்தது. அப்போது போலீசார் பசுபதியின் பையில் ஒரு நகை கடையில் அடகு வைத்த ரசீதைக் கண்டுபிடித்ததும், சந்தேகத்தை வலுப்படுத்தி தீவிர விசாரணை மேற்கொண்டனர்.

அதில் பசுபதி , கடந்த 7ம் தேதி இரவு 11 மணியளவில், சந்திரா வீட்டின் பின்வாசல் வழியாக நுழைந்து, தூங்கிக் கொண்டிருந்த சந்திராவின் முகத்தை  அழுத்தி கொலை செய்ததாகவும், பின்னர் தங்க நகைகளை எடுத்துக்கொண்டு கடையில் அடகு வைத்ததாகவும், அந்த பணத்தில்  மதுவிழா நடத்தி இருந்ததாகவும் ஒப்புக்கொண்டார். சந்திராவின் கணவர் சில வருடங்களுக்கு முன்பு மரணமடைந்த நிலையில், மகள் வெளியூரில் குடும்பத்துடன் வாழ்ந்ததால், சந்திரா தனியாகவே வீடில் வசித்து வந்தார். அந்த தனிமையே பசுபதிக்கு வாய்ப்பாக அமைந்தது.

இந்த முழு விவகாரத்தை ஒப்புக்கொண்ட பசுபதியை, போலீசார் கொலை மற்றும் கொள்ளை குற்றங்களில் கைது செய்து, சட்டத்தின்கீழ் கைது செய்து நீதிமன்றத்தில் ஆஜர்படுத்தி நீதிமன்ற காவலுக்கு அனுப்பியுள்ளனர். ஒரு வயதான பெண்ணை நகைக்காக கொன்ற கொடூரம், அந்தப் பகுதியில் மட்டுமல்லாமல், முழு மாவட்டத்தையே அதிர்ச்சியில் ஆழ்த்தி உள்ளது. “நம்பிக்கையை துரோகம் செய்தவன், பக்கத்து வீட்டுக்காரனே என்பது” என்ற உண்மை, மீண்டும் ஒருமுறை  மக்கள் மத்தியில் ஆதங்கத்தையும் ,அச்சத்தை ஏற்படுத்தி உள்ளது.