தூத்துக்குடி மாவட்டம் எட்டயபுரம் அருகே நிகழ்ந்த சம்பவம் அதிர்ச்சியை ஏற்படுத்தியுள்ளது.  மதுரையில் வேலை செய்து வந்த 27 வயதான விநாயகமூர்த்தி, இரவு பணி முடிந்து பஸ்சில் ஊருக்குத் திரும்பிய பின்னர், எட்டயபுரம் புறவழிச்சாலையில், சாலையோர தடுப்புச்சுவரை ஒட்டி நிறுத்தப்பட்டிருந்த டேங்கர் லாரிக்கு அருகில் படுத்து தூங்கியிருந்தார்.

பின்னர் அவர் தூக்கத்தில் புரண்டு லாரியின் கீழ் சென்று, அங்கேயே தூங்கியபடியே இருந்தார். அதிகாலை, தூங்கி எழுந்த லாரி டிரைவர் லாரியை இயக்கியபோது, சக்கரத்தில் சிக்கிய விநாயகமூர்த்தி பரிதாபமாக உயிரிழந்தார்.

முன்னதாக, மதுரை மேலமடை பகுதியில் ரூ.150 கோடியில் நடைபெற்று வந்த மேம்பாலம் பணிக்காக நிறுத்தப்பட்டிருந்த ரோடு ரோலர் வண்டியின் கீழ் சென்று அமர்ந்திருந்த மேற்பார்வையாளராக பணியாற்றிய 28 வயதான கருப்பசாமி, டிரைவர் கவனக்குறைவால் உயிரிழந்த சம்பவமும் சமீபத்தில் பெரிய அதிர்வை ஏற்படுத்தியது.

ரோடு ரோலரை இயக்கிய ஆப்ரேட்டர், அருகிலிருந்த ஒலிபெருக்கியின் சத்தம் காரணமாக கூச்சல்களை கேட்காமல் வாகனத்தை இயக்கியதால் இந்த உயிரிழப்பு ஏற்பட்டது.

சாலையோரங்களில் வாகனங்களின் அருகே தூங்குவது போன்ற செயல்கள் உயிருக்கு பயங்கரமான ஆபத்தை ஏற்படுத்தக்கூடியது என்பதை மக்கள் உணர வேண்டும். அதேசமயம் வாகன ஓட்டிகள், குறிப்பாக டிரைவர்கள், வாகனத்தை இயக்கும் முன் அதன் சுற்றுப்புறத்தை நன்கு பரிசோதித்து, பிறகு மட்டுமே இயக்க வேண்டும்.