ஜம்மு காஷ்மீர் பகல்காமில் ஏப்ரல் 22ஆம் தேதி பயங்கரவாதிகள் திடீரென தாக்குதல் நடத்தினர். இந்த தாக்குதலில் 26 பேர் உயிரிழந்தனர். இதனையடுத்து இந்தியா – பாகிஸ்தான் இடையே போர் சூழ்நிலை உருவானது. இந்திய இராணுவம் மே 7-ஆம் தேதி “ஆபரேஷன் சிந்தூர்” தாக்குதலை நடத்தியது.  இதில் பாகிஸ்தான் பயங்கரவாத முகாம்கள் குறி வைத்து அழிக்கப்பட்டது.

பாகிஸ்தானின் பவல்பூர் (ஜெய்ஷ் தலைமையகம்) மற்றும் முரிட்கே (லஷ்கர்-ஏ-தொய்பா பயிற்சி மையம்) போன்ற இடங்களில் தாக்குதல் நடத்தப்பட்டதாகவும், கிட்டத்தட்ட 100 பயங்கரவாதிகள் தாக்கப்பட்டு அழிக்கப்பட்டனர் எனத் தெரிவிக்கப்பட்டது.

இந்த நிலையில் அமிர்தசரஸில் உள்ள புனித பொற்கோயிலை குறி வைத்து பாகிஸ்தான் ட்ரோன் மற்றும் ஏவுகணை மூலம் தாக்க முயற்சி செய்தது. இந்தத் தாக்குதலில் “கமிகேஸ்” ட்ரோன்கள், YIHA-III, Songar போன்ற நவீன Turkish ட்ரோன்கள் பயன்படுத்தப்பட்டதாக இந்திய இராணுவம் தெரிவித்துள்ளது.

ஆனால், இந்தியாவின் வான்வழி பாதுகாப்பு அமைப்பு எச்சரிக்கையுடன் செயல்பட்டு இந்த அனைத்து ட்ரோன்களையும் துல்லியமாக வீழ்த்தி தாக்குதலை முற்றிலுமாகக் முறியடித்தது. மேலும், மே 8-9 ஆம் தேதி இரவில் பாகிஸ்தான் மீண்டும் ஊடுருவ முயற்சி செய்தபோது, இந்திய இராணுவம் தனது துல்லியமான தாக்குதல்களால் அனைத்தையும் முறியடித்தது.