சர்வதேச விமானப் போக்குவரத்து வரலாற்றில் மிகப்பெரிய மாற்றத்தையும், இன்றைக்கு நாம் பின்பற்றும் அத்தியாவசியப் பாதுகாப்பு விதிகளையும் உருவாக்கிய ஒரு வரலாற்றுச் சிறப்புமிக்க விமான விபத்தின் மர்மம், சரியாக 74 ஆண்டுகளுக்குப் பிறகு தற்போது விலகியுள்ளது. கடந்த 1952-ஆம் ஆண்டு அட்லாண்டிக் பெருங்கடலில் விழுந்து மூழ்கிய ‘பேன் ஆம்’  நிறுவனத்திற்குச் சொந்தமான பயணியர் விமானத்தின் சிதைந்த பாகங்கள், தற்போது கடலின் ஆழமான பகுதியில் வெற்றிகரமாகக் கண்டுபிடிக்கப்பட்டுள்ளன.

அமெரிக்காவின் தன்னாட்சிப் பிரதேசமான போர்ட்டோ ரிகோவின் சான் ஜுவான் நகரிலிருந்து, 64 பயணிகள் மற்றும் 5 ஊழியர்கள் என மொத்தம் 69 பேருடன் நியூயார்க் நகரை நோக்கி அந்த விமானம் புறப்பட்டது. ஆனால், புறப்பட்ட சிறிது நேரத்திலேயே எதிர்பாராதவிதமாக விமானத்தின் எஞ்சின்களில் கோளாறு ஏற்பட்டு, அட்லாண்டிக் பெருங்கடலில் அவசரமாகத் தரையிறக்கப்பட்டது. விமானம் கடலில் விழுந்த வேகத்தில் முழுமையாக உடையாமல் மிதந்தபோதிலும், அடுத்த மூன்றே நிமிடங்களில் ஆழ்கடலுக்குள் வேகமாக மூழ்கத் தொடங்கியது.

அந்தச் சமயத்தில் பயணிகளுக்கு முறையான அவசரகாலப் பாதுகாப்பு வழிகாட்டுதல்களோ அல்லது மிதவை உடைகளை  அணியும் முறைகளோ முன்னரே விளக்கப்படாத காரணத்தால், தீவிரக் குழப்பமும் பதற்றமும் நிலவியது. இதன் காரணமாக, விமானத்தில் இருந்தவர்களில் 17 பேர் மட்டுமே உயிருடன் மீட்கப்பட்டனர்; 52 பேர் பரிதாபமாக நீரில் மூழ்கி உயிரிழந்தனர். இந்த சோகமான விபத்துக்குப் பிறகே, உலகெங்கிலும் உள்ள அனைத்துப் பயணியர் விமானங்களிலும் “பயணத் தொடக்கத்திற்கு முன்பான பாதுகாப்பு வழிகாட்டுதல்” வழங்குவது கட்டாயமாக்கப்பட்டது.

நீண்ட 74 ஆண்டுகளாக இந்த விமானத்தின் பாகங்கள் எங்கிருக்கின்றன என்று தெரியாமல் இருந்த சூழலில், நவீன சோனார் தொழில்நுட்பம் மற்றும் ஆழ்கடல் ட்ரோன்களைப் பயன்படுத்தித் தீவிரத் தேடுதல் வேட்டை நடத்தப்பட்டது. இதன் பலனாக, போர்ட்டோ ரிகோவின் வடக்குக் கடற்கரையிலிருந்து அட்லாண்டிக் பெருங்கடலின் 2,000 அடி ஆழத்தில், சிதைந்த நிலையில் கிடந்த அந்த விமானத்தின் இறக்கைகள் மற்றும் வால் பகுதிகளை ஆய்வுக் குழுவினர் தற்போது கண்டுபிடித்துள்ளனர். இந்த வரலாற்றுப் பூர்வமான கண்டுபிடிப்பு, பல தசாப்தகால அட்லாண்டிக் பெருங்கடல் மர்மத்திற்கு முற்றுப்புள்ளி வைத்துள்ளது.