தமிழக சட்டமன்றத் தேர்தல் நெருங்கி வரும் வேளையில், திமுக மற்றும் காங்கிரஸ் கட்சிகளுக்கிடையே தொகுதிப் பங்கீடு குறித்த பேச்சுவார்த்தைகள் அனல் பறக்கத் தொடங்கியுள்ளன. காங்கிரஸ் தரப்பில் 41 தொகுதிகள் வரை கேட்கப்பட்ட நிலையில், திமுகவோ ஒரு நாடாளுமன்றத் தொகுதிக்கு மூன்று சட்டமன்றத் தொகுதிகள் என்ற கணக்கின்படி மொத்தம் 27 தொகுதிகளை மட்டுமே ஒதுக்க முன்வந்துள்ளதாகத் தெரிகிறது. இந்த எண்ணிக்கையைத் தாண்டி காங்கிரஸ் பிடிவாதம் பிடித்தால், அடுத்தகட்டமாகத் தங்களது ரகசிய சர்வே அறிக்கையை முன்வைக்க திமுக தலைமை தயாராக இருப்பதாகத் தகவல்கள் வெளியாகியுள்ளன.

​திமுக எடுத்துள்ள அந்த ரகசிய சர்வேயில், தற்போது பதவியில் உள்ள 12 காங்கிரஸ் எம்.எல்.ஏ-க்களின் செயல்பாடு மற்றும் தொகுதி செல்வாக்கு திருப்திகரமாக இல்லை என்று குறிப்பிடப்பட்டுள்ளதாம். இந்த 12 பேர் மீண்டும் அதே தொகுதிகளில் போட்டியிட்டால், அது எதிர்தரப்பான என்.டி.ஏ (NDA) கூட்டணி வெற்றி பெறவே வழிவகுக்கும் என்று அந்த அறிக்கையில் எச்சரிக்கப்பட்டுள்ளதாகத் தெரிகிறது. தற்போதைய கள நிலவரத்தைக் காட்டி காங்கிரஸின் தொகுதிகளின் எண்ணிக்கையைக் குறைக்கவும், வெற்றி வாய்ப்புள்ள இடங்களை மட்டுமே ஒதுக்கவும் திமுக இந்த அதிரடி வியூகத்தைக் கையில் எடுத்துள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது.