இந்தியாவில் வரும் ஜூன் 21-ஆம் தேதி நடைபெறவுள்ள நீட்-யுஜி 2026 (NEET-UG 2026) மறுதேர்வின் போது, முறைகேடுகள் மற்றும் போலித் தகவல்கள் பரவுவதைத் தடுப்பதற்காக டெலிகிராம் (Telegram) செயலிக்கு மத்திய அரசு தற்காலிகத் தடை விதித்துள்ளது. தேசிய தேர்வு முகமையின் (NTA) பரிந்துரையின்படி, தகவல் தொழில்நுட்பச் சட்டம் 2000-இன் பிரிவு 69A-கீழ் மத்திய மின்னணு மற்றும் தகவல் தொழில்நுட்ப அமைச்சகம் இந்த அதிரடி உத்தரவைப் பிறப்பித்துள்ளது.

இதன் காரணமாக கூகுள் பிளே ஸ்டோரிலிருந்து டெலிகிராம் ஆப் ஏற்கனவே நீக்கப்பட்டுள்ள நிலையில், வரும் ஜூன் 22 வரை இந்தத் தடை அமலில் இருக்கும் என்றும், மேலும் ஜூன் 30 வரை இந்தியாவில் ஏற்கனவே அனுப்பப்பட்ட மெசேஜ்களை எடிட் செய்யும் வசதியை டெலிகிராம் முடக்க வேண்டும் என்றும் மத்திய அரசு உத்தரவிட்டுள்ளது. பழைய மெசேஜ்களில் வினாத்தாள்களை எடிட் செய்து மாற்றி, தேர்வு நடப்பதற்கு முன்பே பேப்பர் லீக் ஆகிவிட்டது போன்ற போலி ஆதாரங்களை உருவாக்கி மோசடி கும்பல்கள் மாணவர்களிடையே மன அழுத்தத்தை ஏற்படுத்தியதால் இந்த நடவடிக்கை எடுக்கப்பட்டுள்ளதாக என்டிஏ இயக்குனர் அபிஷேக் சிங் விளக்கியுள்ளார்.

​மத்திய அரசின் இந்த அதிரடி தடை உத்தரவிற்கு டெலிகிராம் நிறுவனத்தின் சிஇஓ பாவெல் துரோவ் (Pavel Durov) தனது எக்ஸ் (X) பக்கத்தில் கடும் கண்டனம் தெரிவித்துள்ளார். வினாத்தாள்களை கசியவிட்ட முக்கியக் குற்றவாளிகளை விடுத்து, இந்தியாவில் உள்ள 15 கோடிக்கும் அதிகமான சாதாரண டெலிகிராம் பயனர்களை இந்த முடிவு தண்டிப்பதாகக் குறிப்பிட்டுள்ள அவர், இந்த தடையால் எதையும் தடுத்துவிட முடியாது என்றும், இந்த மோசடிகள் ஏற்கனவே மற்ற செயலிகளுக்கு மாறிவிட்டன என்றும் விமர்சித்துள்ளார்.

இதற்கிடையே, சைபர் பாதுகாப்பு நிபுணர்கள் மற்றும் இணைய சுதந்திர அமைப்புகள் (IFF) இந்த தடையை ஒரு தற்காலிகமான மற்றும் தேவையற்ற தீர்வு என்று விமர்சித்துள்ள வேளையில், ஐஐடி கான்பூர் இயக்குனர் மணீந்திர அகர்வால் போன்ற கல்வி வல்லுநர்கள், எடிட் செய்ததைக் காட்டாத டெலிகிராமின் பிரத்யேக அம்சம் மிகவும் ஆபத்தானது என்பதால், போலி செய்திகளால் ஏற்படும் குழப்பத்தைத் தடுக்க இந்த நடவடிக்கை அவசியம் என்று ஆதரவு தெரிவித்துள்ளனர்.