சீனாவின் ஜெஜியாங் மாகாணத்தைச் சேர்ந்த 101 வயதான ஜியாங் யுவேகின், ஆரோக்கியமான வாழ்விற்கான பொதுவான விதிகளை உடைத்து, தனது ‘தலைகீழ்’ வாழ்க்கை முறையினால் வைரலாகி வருகிறார்.

பொதுவாக முதியவர்கள் சீக்கிரம் உறங்கி அதிகாலையில் எழுவார்கள்; ஆனால் யுவேகின் தினமும் இரவு 2 மணி வரை விழித்திருந்து தொலைக்காட்சி பார்ப்பதை வழக்கமாகக் கொண்டுள்ளார். பின்னர் காலை 10 மணிக்கு நிதானமாக எழுந்து, ஒரு கப் சூடான கிரீன் டீயுடன் தனது நாளைத் தொடங்குகிறார்.

இரண்டு ஆண்டுகளுக்கு முன்பு கீழே விழுந்து கையில் காயம் ஏற்பட்ட பிறகு, அவரது குடும்பத்தினர் வீட்டு வேலைகளைச் செய்ய விடாமல் தடுத்ததால், பகலில் உறங்கி இரவில் விழித்திருக்கும் இந்த வினோதமான பழக்கம் அவருக்கு உருவானதாக அவரது மகள் கூறுகிறார்.

யுவேகின் உணவுப் பழக்கமும் பலரை வியக்க வைத்துள்ளது. 101 வயதிலும் தனது இயற்கையான பற்கள் அனைத்தையும் அப்படியே வைத்துள்ள அவர், பிஸ்கட்டுகள், வென்ஜோ பகுதியில் புகழ்பெற்ற ‘மேட்டிசாங்’ பேஸ்ட்ரி மற்றும் உலர்ந்த சர்க்கரைவள்ளிக் கிழங்கு போன்றவற்றை விரும்பிச் சாப்பிடுகிறார்.

7 பிள்ளைகளை வளர்த்தெடுத்த இவர், தனது கணவருடன் 30 ஆண்டுகளுக்கும் மேலாக ஒரு சிறிய சந்து வீட்டில் மிகவும் நெருக்கமாக வாழ்ந்து வந்துள்ளார். நீண்ட ஆயுளின் ரகசியம் குறித்து அவரிடம் கேட்டபோது, “நல்ல உணவு, ஆழ்ந்த உறக்கம் மற்றும் கிரீன் டீ” முக்கியம் என்று கூறிய அவர், எல்லாவற்றையும் விட ‘எப்போதும் கோபப்படாமல் அமைதியான மனநிலையுடன் இருப்பதே’ தன் ஆரோக்கியத்தின் அடிப்படை ரகசியம் என நெகிழ்ச்சியுடன் தெரிவிக்கிறார்.