உத்தரப் பிரதேச மாநிலம் ஆனந்தநகர் பகுதியில், குடும்பத் தகராறு மற்றும் மனைவியின் மன உளைச்சல் காரணமாக 27 வயது வாலிபர் ஒருவர் தனது வீட்டில் தூக்கிட்டுத் தற்கொலை செய்துகொண்டுள்ளார். உயிரிழந்தவர் அணில் குமார் யாதவின் மகன் வினய் யாதவ் (27) என அடையாளம் காணப்பட்டுள்ளார். இந்தச் சம்பவத்தைத் தொடர்ந்து அப்பகுதியில் பெரும் சோகம் ஏற்பட்டுள்ளது. தகவலறிந்து சம்பவ இடத்திற்கு வந்த காவல்துறையினர், உடலைக் கைப்பற்றிப் பிரேதப் பரிசோதனைக்காக அனுப்பி வைத்துள்ளதுடன், தீவிர விசாரணையைத் தொடங்கியுள்ளனர்.

உயிரிழந்தவரின் குடும்பத்தினர் கூறுகையில், வினய் நீண்ட நாட்களாகவே திருமண பந்தத்தில் ஏற்பட்ட தகராறு மற்றும் மன அழுத்தத்தால் பாதிக்கப்பட்டு வந்ததாகத் தெரிவித்தனர்.  தற்கொலை செய்து கொள்வதற்கு முன்பு அவரிடம் பேசிய அவரது தந்தை அணில் குமார் யாதவ், அவரது மனைவி ரஞ்சனா யாதவ் தனது மகனைத் தொடர்ந்து மன ரீதியாகத் துன்புறுத்தி வந்ததாகவும், “உன்னை நீல நிற டிரம்மில் அடைத்துவிடுவேன்” என்று அடிக்கடி மிரட்டி வந்ததாகவும் குற்றம் சாட்டியுள்ளார். இந்தத் தொடர் மிரட்டல்களும் குடும்பத் தகராறுகளும் வினய்யை மனதளவில் முற்றிலும் உடைத்துவிட்டதாகக் குடும்பத்தினர் கண்ணீர் மல்விட்டுக் கதறினர்.

வினய்யும் ரஞ்சனாவும் சுமார் பத்து ஆண்டுகளுக்கு முன்பு காதலித்துத் திருமணம் செய்துகொண்டனர். இவர்களுக்கு இரண்டு குழந்தைகள் உள்ளனர். கடந்த 2025 டிசம்பர் முதல் ரஞ்சனா தனது தாய்வீட்டிற்குச் சென்றவர், அதன்பிறகு புகுந்த வீட்டிற்குத் திரும்பவில்லை. இதற்கிடையில் இருவருக்கும் இடையே மோதல் அதிகரித்து நீதிமன்றம் வரை வழக்கு சென்றுள்ளது. மேலும், சுமார் இரண்டு ஆண்டுகளுக்கு முன்பு ரஞ்சனா வேறு ஒருவருடன் டெல்லிக்குச் சென்றுவிட்டதாகவும், பின்னர் குழந்தைகளின் எதிர்காலத்தைக் கருத்தில் கொண்டு குடும்பத்தினர் பேசி அவரை மீண்டும் அழைத்து வந்த போதிலும், அவரது முறையற்ற பழக்கம் மாறவில்லை என்றும் குடும்பத்தினர் வேதனை தெரிவித்தனர்.

இதுதவிர, கடந்த ஒரு மாதத்திற்கு முன்பு ரஞ்சனாவின் காதலனும் அவரது நண்பர்களும் சேர்ந்து வினய்யை  கொடூரமாகத் தாக்கியுள்ளனர். இதில் படுகாயமடைந்த வினய்யை அவரது குடும்பத்தினர் இட்டாவாவிற்கு அழைத்து வந்து சிகிச்சை அளித்ததுடன், நீதிமன்றத்தின் வாயிலாகவும் வழக்குத் தொடர்ந்தனர். அந்தச் சம்பவத்திற்குப் பிறகு வினய் கடுமையான மன உளைச்சலில் இருந்துள்ளார். சம்பவத்தன்று இரவுகூட தனது மனைவியுடன் தொலைபேசியில் பேசிய வினய், அதன் பிறகு மிகுந்த கவலையுடன் காணப்பட்டுள்ளார். நள்ளிரவில் வீட்டின் தாழ்வாரத்தில் தூக்கிட்டு அவர் உயிரை மாய்த்துக் கொண்டுள்ளார்.