சென்னையின் இதயப்பகுதியான மயிலாப்பூரில் இன்று நடைபெற்ற கிராமக் கோயில் பூசாரிகள் மாநாட்டில் கலந்துகொண்ட முதலமைச்சர் மு.க.ஸ்டாலின், பூசாரிகளின் வாழ்வாதாரத்தை மேம்படுத்தும் வகையில் 11 அதிரடி அறிவிப்புகளை வெளியிட்டு அசத்தியுள்ளார். இதன்படி, ஒவ்வொரு ஆண்டும் பொங்கல் திருநாளை முன்னிட்டு கிராமக் கோயில் பூசாரிகளுக்கு அரசு சார்பில் புத்தாடைகள் வழங்கப்படும் என்ற இனிப்பான செய்தியை அவர் அறிவித்தார். மேலும், பூசாரிகள் நல வாரியத்தில் உறுப்பினராக உள்ள பூசாரி ஒருவர் எதிர்பாராத விதமாக மரணமடைந்தால், அவரது வாரிசுகளுக்கு வழங்கப்பட்டு வந்த நிதியுதவி ரூ. 50,000-லிருந்து அதிரடியாக ரூ. 1,00,000 ஆக உயர்த்தப்பட்டுள்ளது.

​பூசாரிகளுக்கான சலுகைகளைப் பெறுவதில் இருந்த முட்டுக்கட்டைகளை உடைக்கும் வகையில், ஆண்டு வருமான உச்சவரம்பையும் முதல்வர் ஸ்டாலின் மாற்றியமைத்துள்ளார். இதுவரை ரூ. 1,00,000 ஆக இருந்த வருமான வரம்பு இனி ரூ. 1,25,000 ஆக உயர்த்தப்படும் என்று அறிவிக்கப்பட்டுள்ளதால், கூடுதல் எண்ணிக்கையிலான பூசாரிகள் இனி அரசு நலத்திட்டங்களின் கீழ் பயன்பெற முடியும். மயிலாப்பூர் மாநாட்டில் முதல்வர் வெளியிட்ட இந்த அதிரடி அறிவிப்புகள், தமிழகம் முழுவதும் உள்ள கிராமக் கோயில் பூசாரிகள் மத்தியில் மிகுந்த வரவேற்பையும் மகிழ்ச்சியையும் ஏற்படுத்தியுள்ளது.