திமுக ஆட்சியின் போது மாநில போக்குவரத்து மற்றும் மின்சாரத் துறை அமைச்சராகப் பதவி வகித்த எஸ்.எஸ். சிவசங்கரின் உதவியாளர் இளஞ்செழியன், போக்குவரத்துத் துறையில் வேலை வாங்கித் தருவதாகக் கூறி பண மோசடியில் ஈடுபட்ட புகாரின் பேரில் சென்னை மத்திய குற்றப்பிரிவு போலீசாரால் அதிரடியாகக் கைது செய்யப்பட்டுள்ளார்.

திராவிட முன்னேற்றக் கழகத்தின் குன்னம் தொகுதி சட்டமன்ற உறுப்பினரான சிவசங்கர், கடந்த 2022 முதல் 2026 வரையிலான திமுக ஆட்சிக் காலத்தில் மாநிலப் போக்குவரத்துத் துறையைக் கவனித்து வந்தார். இக்காலக்கட்டத்தில் அவரது பெயரையும், செல்வாக்கையும் பயன்படுத்திப் போக்குவரத்துத் துறையில் பல்வேறு நபர்களுக்குப் பணி நியமனம் பெற்றுத் தருவதாகக் கூறி கோடிக்கணக்கில் இளஞ்செழியன் பண மோசடி செய்ததாகப் புகார்கள் எழுந்தன.

இப்புகாரின் அடிப்படையில் வழக்குப் பதிவு செய்த மத்திய குற்றப்பிரிவு போலீசார், நேற்று  சென்னையில் இளஞ்செழியனைக் கைது செய்து, அவரிடமிருந்து மோசடிப் பணம் எவ்வாறு கைமாறியது மற்றும் இதில் வேறு யாருக்கெல்லாம் தொடர்பிருக்கிறது என்பது குறித்துத் தீவிர விசாரணையைத் தொடங்கியுள்ளனர்.