நாம் உண்ணும் உணவில் காரமும் மசாலாப் பொருட்களும் அதிகமாக இருந்தால் அது சுவையை அதிகரித்தாலும், நமது உடல் ஆரோக்கியத்திற்குப் பல ஆபத்துக்களை ஏற்படுத்தக்கூடும் என்று சமீபத்திய அறிவியல் ஆய்வுகள் எச்சரித்துள்ளன. ‘பிரன்ட்டியர்ஸ் இன் நியூட்ரிஷன்’ இதழில் வெளியிடப்பட்டுள்ள அதிர்ச்சிகரமான ஆய்வறிக்கையின் படி, அளவுக்கு அதிகமாகக் காரமான உணவுகளை உட்கொள்ளும் பழக்கம் நமது உணவுப் பாதையைத் தாக்கும் கொடிய ‘இந்தோபேஜியல்’  எனப்படும் புற்றுநோய் வருவதற்கான அபாயத்தை மிகுதியாக உயர்த்துகிறது என்று கண்டறியப்பட்டுள்ளது.

குறிப்பாக, எப்போதும் நெஞ்செரிச்சல் ஏற்படுவது மற்றும் உணவு குழாயில் தொடர்ச்சியான தொந்தரவுகள் இருப்பது போன்ற பிரச்சினைகளைச் சாதாரணமானதாகக் கருதாமல் உடனடியாகக் கவனம் செலுத்த வேண்டும் என்று மருத்துவ நிபுணர்கள் அறிவுறுத்துகின்றனர்.

உலகம் முழுவதும் நடத்தப்பட்ட 14 வெவ்வேறு ஆய்வுகளின் தரவுகளை அடிப்படையாகக் கொண்டு மேற்கொள்ளப்பட்ட இந்த ஆராய்ச்சியில், சுமார் 1,10,000-க்கும் அதிகமான நபர்களின் விவரங்கள் ஆய்வு செய்யப்பட்டுள்ளன. இதில் குறைந்த அளவில் காரம் உண்பவர்களுடன் ஒப்பிடும் போது, மிக அதிகளவில் காரமான உணவுகளை உட்கொள்ளும் நபர்களுக்கு இரைப்பை மற்றும் செரிமான மண்டலத்தைப் பாதிக்கக்கூடிய புற்றுநோய் தாக்கும் ஆபத்து சுமார் 64 சதவீதம் வரை அதிகமாக இருப்பதாகக் கண்டறியப்பட்டுள்ளது.

மிளகாயில் உள்ள ‘கேப்சைசின்’  என்ற இயற்கை வேதிப்பொருள் சில நேரங்களில் வீக்கத்தைக் குறைக்கும் நன்மைகளைக் கொண்டிருந்தாலும், அது அளவுக்கு மீறிச் செல்லும் போது திசுக்களில் கடுமையான எரிச்சலை ஏற்படுத்தித் தீங்கான கட்டிகள் வளரத் தூண்டுதலாக அமைந்துவிடுகிறது.

இந்தத் தீய பழக்கத்தினால் உடலில் தொடர் நெஞ்செரிச்சல், காரணமின்றி உடல் எடை குறைவது, நாள்பட்ட வயிற்று வலி, தொண்டையில் அடைப்பு அல்லது வீக்கம் மற்றும் மார்புப் பகுதியில் வலி போன்ற பல்வேறு ஆபத்தான அறிகுறிகள் வெளிப்படத் தொடங்கும். நமது நாட்டில் ராஜஸ்தான் போன்ற பல மாநிலங்களில் காரசாரமான உணவுகளை விரும்பிச் சாப்பிடும் வழக்கம் பரவலாக இருந்தாலும், இது போன்ற ஆரோக்கியத்திற்குத் தீங்கு விளைவிக்கும் முறைகளைத் தவிர்ப்பது மிகவும் அவசியமாகும். ஆரோக்கியமான மற்றும் அளவான உணவுகளைத் தேர்ந்தெடுத்து உட்கொள்வதன் மூலமே இதுபோன்ற கொடிய நோய்களின் பிடியிலிருந்து நம்மை நாம் பாதுகாத்துக்கொள்ள முடியும்.