சமூக ஊடகங்களில் வேகமாக பரவி வரும் ஒரு 28 வினாடி வீடியோ, ஒரு பள்ளி மாணவியின் அன்றாட வாழ்வின் கடினத்தன்மையை வெளிப்படுத்தி பலரையும் உலுக்கியுள்ளது. வயதுக்கு மீறிய பொறுப்புகளை ஏற்றுக்கொண்டு இரட்டைச் சுமையுடன் நடந்து செல்லும் அந்தச் சிறுமியின் காட்சி இணைய பயனர்களை ஆழமாக சிந்திக்கச் செய்துள்ளது.

X தளத்தில் @dineshwar_0673 என்ற கணக்கின் மூலம் பதிவிடப்பட்டுள்ள இந்தக் காட்சியில், ஒரு பள்ளி மாணவி தலையில் எரிவாயு சிலிண்டரை சுமந்தபடி, முதுகில் பள்ளிப்பையை சுமந்து  செல்வது தெளிவாகக் காணப்படுகிறது. வீடியோ எங்கு அல்லது எப்போது பதிவு செய்யப்பட்டது என்ற தகவல் உறுதியாக தெரியவில்லை.

வீடியோவிலிருந்து, சிறுமி பள்ளியில் இருந்து திரும்பிக் கொண்டிருப்பது போல் தெரிகிறது. கல்விப் பொறுப்பையும் குடும்பச் சுமையையும் ஒருசேர சுமந்து, நெரிசலான தெருவில் தன்னம்பிக்கையுடன் நடந்து செல்வது, அவள் எதிர்கொள்ளும் வாழ்க்கைப் போராட்டங்களைக் காட்டுகிறது. சிறுமியின் முகத்தில் எவ்விதக் கலக்கம் இல்லாமல், அமைதியாக தனது பாதையைத் தொடரும் மனவுறுதி பார்வையாளர்களை நெகிழச் செய்துள்ளது.

 

வீடியோ வெளியாகியவுடன் சமூக ஊடகங்களில் பல்வேறு எதிர்வினைகள் எழுந்தன. சிலர் வறுமை இன்னும் பல குழந்தைகளின் குழந்தைப் பருவத்தைப் பறிக்கிறது என்ற ஆழ்ந்த வருத்தத்தைத் தெரிவிக்க, சிலர் சமூகம் மற்றும் அரசின் பொறுப்பை எடுத்துக்காட்டினர்.

“வறுமை எந்த குழந்தைக்கும் இதுபோன்ற சுமையை ஏற்படுத்தக்கூடாது” என ஒரு பயனர் கருத்து பதிவு செய்துள்ளார். மற்றொருவர், “பொறுப்பு வயதைப் பார்க்காது, ஆனால் சமூகம் கண்டிப்பாக பார்க்க வேண்டும்” என்று குறிப்பிட்டார். சிலர் அந்தச் சிறுமியின் மனஉறுதியை பாராட்டியும் உள்ளனர். “இத்தகைய காட்சிகள், துன்பத்திற்கு மத்தியிலும் கைவிடாமல் முன்னேறும் ஆயிரக்கணக்கான இளைஞர்களின் வலிமையை நினைவூட்டுகின்றன” என்று ஒருபயனர் பதிவிட்டுள்ளார். மேலும் இந்த வைரல் வீடியோ, குழந்தைகளின் வாழ்வில் நிலவும் சமத்துவமின்மையும் வறுமையும் குறித்த கேள்விகளை மீண்டும் ஒருமுறை சமூகத்தின் முன் நிறுத்தியுள்ளது.