ஹரியான்வி திரையுலகின் வளர்ந்து வரும் இளம் நடிகையும், சமூக வலைதள பிரபலமுமான திவ்யங்கா சிரோஹி (29), திடீர் மாரடைப்பு காரணமாக காலமானார். ஹரியான்வி மொழிப் படங்கள் மற்றும் இசை ஆல்பங்களில் நடித்து வந்த திவ்யங்கா சிரோஹிக்கு, சமீபகாலமாக ரசிகர்கள் மத்தியில் பெரும் வரவேற்பு இருந்தது. 29 வயதே ஆன நிலையில், அவர் மாரடைப்பால் காலமானது திரையுலகினரையும் அவரது ரசிகர்களையும் மீளாத் துயரத்தில் ஆழ்த்தியுள்ளது.

திவ்யங்காவுக்கு இன்ஸ்டாகிராம் பக்கத்தில் சுமார் 13 லட்சத்திற்கும் (1.3 Million) அதிகமான பின்தொடர்பாளர்கள் உள்ளனர். தனது துடிப்பான நடிப்பு மற்றும் ‘ரீல்ஸ்’ வீடியோக்கள் மூலம் இளைஞர்கள் மத்தியில் மிகவும் பிரபலமானவராகத் திகழ்ந்தார். அவர் கடைசியாகப் பகிர்ந்த பதிவுகளில் மிகவும் உற்சாகமாக காணப்பட்ட நிலையில், இந்த திடீர் மரணம் பலரையும் அதிர்ச்சியடைய வைத்துள்ளது.

பிராந்திய மொழிப் படங்களில் ஒரு நம்பிக்கைக்குரிய நட்சத்திரமாகப் பார்க்கப்பட்ட திவ்யங்காவின் மறைவுக்கு, சக கலைஞர்களும் ரசிகர்களும் சமூக வலைதளங்களில் இரங்கல் தெரிவித்து வருகின்றனர். அவரது திறமையும், புன்னகை கலந்த முகமும் என்றும் நினைவில் நிற்கும் எனப் பலரும் உருக்கமாகப் பதிவிட்டுள்ளனர்.

சமீபகாலமாக இளைஞர்கள் மத்தியில் மாரடைப்பு ஏற்படும் சம்பவங்கள் அதிகரித்து வருவது கவலையை ஏற்படுத்தியுள்ளது. மன அழுத்தம், வாழ்வியல் மாற்றங்கள் மற்றும் உடல்நலம் குறித்த விழிப்புணர்வு அவசியத்தை இந்தச் சம்பவம் மீண்டும் ஒருமுறை வலியுறுத்தியுள்ளதாக மருத்துவ வல்லுநர்கள் கருத்து தெரிவித்துள்ளனர்.