ஈரோடு மாவட்டம் சத்தியமங்கலம் குள்ளங்கரடு பகுதியைச் சேர்ந்தவர் ராஜா. கூலித்தொழிலாளியான இவருக்கு நீலாவதி என்ற மனைவியும், சஞ்சனா, சோனியா என்ற இரண்டு மகள்களும் இருந்தனர். மூத்த மகள் சஞ்சனா தனியார் என்ஜினீயரிங் கல்லூரியில் இறுதி ஆண்டும், இளைய மகள் சோனியா பி.எஸ்சி இரண்டாம் ஆண்டும் படித்து வந்தனர்.
வழக்கம்போல குடும்பத்தினர் வீட்டில் இருந்த நிலையில், நேற்று மதியம் இளைய மகள் சோனியா வீட்டில் எந்த வேலையும் செய்யாமல் சும்மா இருந்ததாகத் தெரிகிறது. இதைப் பார்த்த பெற்றோர் ராஜா மற்றும் நீலாவதி ஆகிய இருவருமே, வீட்டில் ஒரு வேலையும் செய்யாமல் இருக்கிறாயே என்று சோனியாவைச் சற்றுக் கண்டித்துள்ளனர்.
பெற்றோர் தன்னை எல்லோர் முன்னிலையிலும் திட்டிவிட்டார்களே என்ற ஆத்திரமும், கடுமையான கோபமும் அந்த இளம் பெண்ணுக்கு ஏற்பட்டுள்ளது. இதனால் கடும் மனவேதனையடைந்த சோனியா, பெற்றோரிடம் எதுவும் பேசாமல் நேராகத் தனது அறைக்குள் சென்று கதவை உள்பக்கமாகப் பூட்டிக்கொண்டார்.
நீண்ட நேரம் ஆகியும் சோனியா அறைக்குள்ளேயே இருந்ததால் சந்தேகமடைந்த பெற்றோர், கதவைச் சென்று தட்டியுள்ளனர். ஆனால் உள்ளே இருந்து எந்தப் பதிலும் வராததால் பதற்றமடைந்த அவர்கள், அக்கம் பக்கத்தினரின் உதவியோடு கதவை அதிரடியாக உடைத்துக்கொண்டு உள்ளே சென்று பார்த்தனர்.
அப்போது சோனியா வீட்டின் விட்டத்தில் சேலையால் தூக்குப்போட்டு தற்கொலை செய்துகொண்டதைக் கண்டு பெற்றோர் அதிர்ச்சியில் உறைந்தனர். தங்களின் செல்ல மகள் பிணமாகத் தொங்குவதைப் பார்த்த பெற்றோர் கதறித் துடித்தனர். இந்தத் துயரச் சம்பவம் குறித்து உடனடியாக சத்தியமங்கலம் போலீசாருக்கு தகவல் தெரிவிக்கப்பட்டது.
தகவலறிந்து சம்பவ இடத்திற்கு விரைந்து வந்த போலீசார், சோனியாவின் உடலைக் கைப்பற்றி பிரேத பரிசோதனைக்காகச் சத்தியமங்கலம் அரசு ஆஸ்பத்திரிக்கு அனுப்பி வைத்தனர். மேலும், பெற்றோர் திட்டியதற்காகக் கல்லூரி மாணவி விபரீத முடிவு எடுத்த இந்தச் சம்பவம் குறித்து போலீசார் வழக்குப் பதிவு செய்து தீவிர விசாரணை நடத்தி வருகிறார்கள்.
