தமிழக சட்டமன்றத் தேர்தல் முடிவுகள் வெளியாகி வரும் நிலையில், தமிழக வெற்றிக் கழகத் தலைவர் விஜய் 108 தொகுதிகளில் வெற்றி பெற்று சாதனை படைத்துள்ளார்.

இந்த மெகா வெற்றியைத் தொடர்ந்து, திரைத்துறையினர் மட்டுமின்றி அரசியல் விமர்சகர்களும் விஜய்க்கு வாழ்த்துகளைக் குவித்து வருகின்றனர்.

அந்த வகையில், தேர்தலுக்கு முன்பு விஜய் மீது கடுமையான விமர்சனங்களை முன்வைத்து வந்த இயக்குநர் சேரன், தற்போது தனது நிலைப்பாட்டை மாற்றிக்கொண்டுள்ளார்.

தனது எக்ஸ் தளப் பதிவில், “சந்தித்த முதல் தேர்தலிலேயே மக்களின் பெரும் ஆதரவைப் பெற்றுள்ள விஜய்யை மனமுவந்து வாழ்த்துகிறேன்.

பழைய அரசியல் கட்சிகளின் பிடியில் இருந்து எங்களை விடுவித்து, தமிழ்நாட்டில் சுதந்திரக் காற்றை வீசச் செய்தமைக்கு நன்றி. முன்னதாக உங்கள் மீது வைத்த விமர்சனங்களுக்காக வருந்துகிறேன்” என உருக்கமாகத் தெரிவித்துள்ளார்.

மறுபுறம், ஆட்சியமைப்பதற்கான பெரும்பான்மை பலத்தைத் திரட்டும் வேலையில் தவெக மும்முரமாக இறங்கியுள்ளது. இதற்காக காங்கிரஸ், இடதுசாரிகள் மற்றும் விடுதலைச் சிறுத்தைகள் கட்சியின் ஆதரவை விஜய் முறைப்படி கோரியுள்ளார்.

இது குறித்துப் பேசிய விசிக பொதுச் செயலாளர் ரவிக்குமார் எம்.பி, “தவெக-வுக்கு ஆதரவு கோரி எங்கள் தலைவர் திருமாவளவனுக்கும் கடிதம் வந்துள்ளது.

மதச்சார்பற்ற கட்சிகளின் ஆதரவுடன் ஒரு நல்ல ஆட்சியை வழங்க விஜய் உறுதியாக இருக்கிறார். இது தொடர்பாக எங்களது கட்சித் தலைவர் விரைவில் தனது முடிவை அறிவிப்பார்” என்று பாசிட்டிவ் சிக்னல் கொடுத்துள்ளார்.

மும்மொழி கொள்கை மற்றும் இந்தி திணிப்புக்கு எதிராக புதுச்சேரியில் போராட்டம் நடத்தி வரும் வேளையில், விஜய்யின் இந்த அரசியல் நகர்வு தமிழக அரசியலில் புதிய கூட்டணியை உருவாக்கும் என எதிர்பார்க்கப்படுகிறது.