பாகிஸ்தான் மற்றும் வங்கதேச அணிகளுக்கு இடையிலான ஒருநாள் கிரிக்கெட் தொடரின் தீர்மானிக்கப்பட வேண்டிய கடைசிப் போட்டியில், மைதானமே அதிரும் வகையில் பெரும் பரபரப்பு ஏற்பட்டது. கடைசி ஓவரில் நடுவர் கொடுத்த ஒரு தீர்ப்பை, வங்கதேச அணி துணிச்சலாக மாற்றிய விதம் ஆட்டத்தின் போக்கையே தலைகீழாக மாற்றியது.
பாகிஸ்தான் வெற்றி பெற கடைசி ஓவரில் சில ரன்களே தேவைப்பட்ட நிலையில், வங்கதேசத்தின் சுழற்பந்து வீச்சாளர் ரிஷாத் ஹொசைன் 50-வது ஓவரை வீசினார். களத்தில் பாகிஸ்தான் வீரர் ஷாகின் அப்ரிடி அதிரடியாக விளையாடத் தயாராக இருந்தார். ஓவரின் ஐந்தாவது பந்தை ரிஷாத் வீச, அது லெக் ஸ்டம்ப்பிற்கு வெளியே சென்றது. களத்தில் இருந்த நடுவர் குமார் தர்மசேனா அதை ‘வைடு’ (Wide) என அறிவித்தார்.
View this post on Instagram
நடுவர் வைடு கொடுத்தவுடன், பந்து பேட்டில் பட்டதாக ரிஷாத் ஹொசைனும், விக்கெட் கீப்பர் லிட்டன் தாஸும் உறுதியாக நம்பினர். பொதுவாக வைடு பந்திற்கு ரிவியூ எடுப்பது அரிது என்றாலும், ஆட்டத்தின் முக்கியத்துவத்தை உணர்ந்து வங்கதேச அணி உடனடியாக ரிவியூ எடுத்தது.
மூன்றாவது நடுவர் ‘அல்ட்ரா எட்ஜ்’ (UltraEdge) சோதனையை மேற்கொண்டபோது, பந்து பேட்டின் நுனியில் பட்டதற்கான தெளிவான ‘ஸ்பைக்’ (Spike) தெரிந்தது. இதனால் அதிர்ச்சியடைந்த நடுவர் தர்மசேனா, தனது முடிவை மாற்றி அது வைடு இல்லை என அறிவித்தார்.
இந்த ஒரு முடிவால் பாகிஸ்தானுக்கு கிடைக்க வேண்டிய கூடுதல் ரன் பறிபோனதுடன், அது ஒரு சரியான பந்தாகவும் கணக்கிடப்பட்டது. பந்தை விக்கெட் கீப்பர் லிட்டன் தாஸ் சரியாகப் பிடிக்காததால் ஷாகின் அப்ரிடி அவுட் ஆகவில்லை என்றாலும், அந்த ஓவரில் ரன்கள் வராதது பாகிஸ்தானுக்கு பெரும் பின்னடைவை ஏற்படுத்தியது.
நடுவரின் முடிவால் அதிருப்தி அடைந்த ஷாகின் அப்ரிடி மைதானத்திலேயே தனது கோபத்தை வெளிப்படுத்தினார். இருப்பினும், விதிகளின்படி வங்கதேசத்தின் ரிவியூ சரியானதாக அமைந்ததால் பாகிஸ்தான் தோல்வியைத் தழுவியது. சல்மான் அலி ஆகா சதமடித்தும் பாகிஸ்தான் அணியால் வெற்றியை எட்ட முடியாமல் போனது. மேலும் இதன் மூலம் வங்கதேச அணி ஒருநாள் தொடரை கைப்பற்றி வரலாற்று சாதனை படைததுள்ளது.
