தமிழகத்தில் சட்டசபைத் தேர்தல் நெருங்கி வரும் வேளையில், தேமுதிகவின் கூட்டணி குறித்த எதிர்பார்ப்பு அதிகரித்துள்ளது. அதிமுக மற்றும் திமுக ஆகிய இரு தரப்புமே தேமுதிகவுக்கு சட்டசபை இடங்களுடன் ராஜ்யசபா சீட் தர முன்வந்துள்ளதாக அக்கட்சியின் பொதுச்செயலாளர் பிரேமலதா விஜயகாந்த் தெரிவித்துள்ளார்.

தற்போது விருப்பமனு விநியோகம் தொடங்கி நடைபெற்று வரும் சூழலில், கூட்டணி குறித்து ஆலோசித்து விரைவில் நல்ல முடிவு அறிவிக்கப்படும் என அவர் உறுதியளித்துள்ளார்.

கடந்த 2024 மக்களவைத் தேர்தலின் போது ஏற்பட்ட கசப்பான அனுபவங்கள் குறித்துப் பேசிய பிரேமலதா, அப்போது ஒரு ராஜ்யசபா சீட் தருவதாக அதிமுக வாக்குறுதி அளித்ததாகவும், ஆனால் பின்னர் தேதியை மாற்றியதால் அதிருப்தி ஏற்பட்டதாகவும் குறிப்பிட்டார்.

“அதிமுக தலைமையின் வார்த்தையை நம்பி ஒப்பந்தத்தில் கையெழுத்திட்டேன், ஆனால் அவர்கள் சொன்னபடி நடக்கவில்லை” என்று அவர் வெளிப்படையாகத் தெரிவித்தார். இருப்பினும், அது கடந்த காலம் என்பதால் அதைத் தற்போது பெரிதாக எடுத்துக் கொள்ளவில்லை என்றும் அவர் கூறினார்.

தற்போதைய நிலையில் எந்தக் கட்சியுடன் கூட்டணி என்பதை அவர் இன்னும் உறுதிப்படுத்தவில்லை. ராஜ்யசபா சீட்டை மட்டும் குறிவைத்துப் பேச்சுவார்த்தை நடத்தவில்லை என்றும், கட்சியின் நலன் மற்றும் தொண்டர்களின் விருப்பத்தின் அடிப்படையில் சரியான நேரத்தில் கூட்டணி குறித்த அறிவிப்பு வெளியாகும் என்றும் அவர் தெளிவுபடுத்தியுள்ளார்.