அசாம் மாநிலம் ஜோர்கட் பகுதியில் உள்ள இந்திய விமானப்படை தளத்தில், ராணுவத்திற்குச் சொந்தமான AN32 ரக விமானம் பயங்கர விபத்துக்குள்ளானதில் 5 வீரர்கள் பரிதாபமாக உயிரிழந்துள்ளனர். அந்த விமானம் ஜோர்கட் படைத்தளத்தின் ஓடுதளத்தில் (Runway) தரையிறங்கிய சில நொடிகளிலேயே எதிர்பாராத விதமாகப் பயங்கர சத்தத்துடன் வெடித்துத் தீப்பற்றியுள்ளது. இந்த விபத்தின் வேகம் மிகக் கொடூரமாக இருந்ததால், விமானத்திற்குள் இருந்த 5 வீரர்களால் தப்பிக்க முடியாமல் சம்பவ இடத்திலேயே உடல் கருகி உயிரிழந்த சோகம் நடந்துள்ளது.

​இந்த கோர விபத்தில் படுகாயமடைந்த துணைக் கமாண்டர் (துணை விமானி) அதிர்ஷ்டவசமாக உயிருடன் மீட்கப்பட்டுள்ளார். தீப்பிடித்த விமானத்தில் இருந்து அவரை மீட்ட ராணுவத்தினர், உடனடியாக அவருக்குத் தீவிர சிகிச்சை அளிப்பதற்காக மருத்துவமனையில் அனுமதித்துள்ளனர். விமானப்படை தளத்தில் நடந்த இந்தத் திடீர் விபத்து மற்றும் ராணுவ வீரர்களின் மரணம் ஒட்டுமொத்த நாட்டையும் பெரும் அதிர்ச்சியிலும் சோகத்திலும் ஆழ்த்தியுள்ளது. விபத்துக்கான காரணம் குறித்து ராணுவம் தீவிர விசாரணை நடத்தி வருகிறது.