முன்னாள் முதல்வர் ஓபிஎஸ் அவர்களின் தற்போதைய அரசியல் நிலைப்பாட்டை பாஜக நிர்வாகி குஷ்பு மிகக் கடுமையான வார்த்தைகளால் விமர்சித்துள்ளார். அதிமுகவிலிருந்து நீக்கப்பட்ட பிறகு, ஓபிஎஸ் எந்தப் பக்கமும் நிலையாக நிற்க முடியாமல் திணறி வருவதாக அவர் சுட்டிக்காட்டியுள்ளார். “இங்கேயும் இல்லாமல், அங்கேயும் இல்லாமல் எங்கு செல்வது என்று தெரியாமல் அவர் திக்குமுக்காடி வருகிறார்; அவரைப் பார்க்கும்போது கஷ்டமாக இருக்கிறது” என்று குஷ்பு கிண்டலாகவும் காரசாரமாகவும் பேசியுள்ளார்.
குறிப்பாக, திமுக அரசுக்கு ஆதரவாக ஓபிஎஸ் சமீபத்தில் பேசியதை முன்வைத்து குஷ்பு இந்தத் தாக்குதலை நடத்தியுள்ளார். யாராவது தன்னைத் தங்கள் கூட்டணியில் சேர்த்துக் கொள்ள மாட்டார்களா என்ற ஏக்கத்தில் அவர் போராடி வருவதாக குஷ்பு விமர்சித்துள்ளார். ஓபிஎஸ்-ஸின் இந்தத் திடீர் திமுக ஆதரவு நிலைப்பாடு, அவர் தனது அரசியல் எதிர்காலத்தைத் தக்கவைத்துக் கொள்ள எடுக்கும் கடைசி முயற்சி என்பதைப் போலவே பாஜக தரப்பு சித்தரித்துள்ளது.
